काठमाडौँ — भिजिट भिसामा जाने यात्रुका लागि जुन देशको भिसा लागेको हो, त्यही देशका लागि मात्रै गन्तव्य हुने गरी प्रस्थान अनुमतिको व्यवस्था सुरु भएको छ ।

त्रिभुवन अन्तर्राष्ट्रिय विमानस्थल अध्यागमन कार्यालयले नेपालबाट भिजिट भिसामा खाडी मुलुक जाने यात्रुको राहदानीमै गन्तव्य मुलुकको नाम लेखेर 'वन्ली' लेखेर छाप लगाएर मात्रै प्रस्थान अनुमति दिन थालिएको हो ।

भिजिट भिसामा हुने असुली र अनियमितता रोक्न तथा जुन देशको लागि अनुमति लिइएको हो, त्यसपछि गिरोहको सेटिङमा अर्को मुलुक जाने योजना रोक्न यस्तो प्रबन्ध गरिएको अध्यागमन कार्यालयले जनाएको छ ।

गिरोहले कतार, साउदी, युएई, ओमानलगायतमा भिजिट भिसामा लगेर त्यसपछि अन्यत्र पठाउन र भिजिटमा लगेर भिसा परिवर्तन गराई अन्यत्र काममा लगाउने गरेको आरोप छ ।