काठमाडौँ — सोमबार माइतीघरबाट सुरु भएको जेन-जीको प्रदर्शन संयमित रुपमा बानेश्वरतर्फ अघि बढेको थियो । त्यहाँ पुग्दासम्मा संख्या बढ्दो क्रममा देखिन्थ्यो ।

बिहान ९ बजे : कोही स्कुलको पोसाकसहित त कोही पम्प्लेटसहित माइतीघर क्षेत्रमा जम्मा हुँदै थिए । गाडीमा साउन्ड सिस्टम थियो । तिनमा राष्ट्रिय गीतसँगै भाषणका आवाज सुनिएका थिए । 

१० बजे : कोही चित्रमार्फत, कोही पम्प्लेटमार्फत राष्ट्रिय झन्डा बोकेर, कोही उभिएर अनि कोहीले भुइँमै बसेर आन्दोलनका नारा चर्काइरहेका थिए । कोही अभिभावकसँगै आएका थिए, कोही स्कुलका साथीहरूको साथ लागेका थिए । 

१०: ३० बजे : माइतीघरबाट आन्दोलनमा रहेकाहरू बाटो ढाकेर बबरमहलतिर निस्किए । 

११ बजे : बाटो अवरुद्ध गर्दै पुगेको टोली बिजुली बजार पुल पुग्यो । कतिपयले त्यहाँभन्दा पर नजाऔं भन्दै हातले लाइन बनाएर रोक्न खोजे । तर साथीहरूलाई नै बेवास्ता गरेर जेन–जीको प्रदर्शन अघि बढ्यो । 

११: १५ बजे : बानेश्वरको एभरेस्ट होटल अगाडिदेखि निषेधित क्षेत्र भएको भन्दै प्रहरीले ब्यारिकेड राखेको थियो । तर प्रदर्शनकारीले धकेलाधकेल गर्दै ब्यारिकेड तोड्ने प्रयास गरे । प्रहरीको ब्यारिकेडसँगै एपीएफ पनि खटिएको थियो । यही बेला बानेश्वरतर्फ जाँदा देब्रेतर्फ रहेको ब्यारिकेड तोडिए पनि प्रदर्शनमा रहेकाहरू अघि बढेका थिएनन् । 

११: ४५ बजे : बानेश्वरतर्फ रहेका प्रदर्शनकारीलाई प्रहरीले ब्यारिकेड कटाउँदै थियो । यही क्रममा ठूलो भीड बानेश्वरतिरबाट आयो र दाहिनेतर्फको ब्यारिकेड भत्काइदियो । त्यसपछि भीड बानेश्वरतिर बढ्यो । यही बेला भीड नियन्त्रण गर्न प्रहरीले पानीको फोहरा हान्यो । 

११: ५० बजे : प्रहरीले यही बेला अश्रुग्यास प्रहार गर्न थाल्यो । बानेश्वरतर्फ गएको भीड संसद् भवनको मुख्य गेटबाट भित्र छिर्न खोज्यो । कोही गेटमाथि पनि चढे र उनीहरूले संसद् भवनका भित्ता प्वाल पार्नेदेखि तारबार भत्काउन थाले ।