काठमाडौँ — सामाजिक सञ्जालमाथिको प्रतिबन्ध, भ्रष्टाचार र करको दुरुपयोगको विरोधमा जेन-जीले गरेको विरोधमा एउटा फरक झन्डा प्रयोग भइरहेको छ ।

काठमाडौँको माइतीघरमा भेला भएका युवा पुस्ताले हातमा पोस्टरमात्र नभएर एक विशेष झन्डा बोकेका छन् । कालो पृष्ठभूमिमा खोपडी र हड्डीको चित्र भएको त्यो झन्डाको आफ्नै कथा छ । 

यो झन्डा जापानी एनिमे तथा मांगा ‘वान पिस’ बाट लिइएको हो । जेन-जीमा लोकप्रिय यस एनिमेका मुख्य पात्र मन्की डी लुफीले नेतृत्व गर्ने ‘स्ट्र ह्याट पाइरेट्स’ समूहलाई यो झन्डाले चिनाउँछ । खोपडीमाथि टोपी भएको यो चिह्नलाई एनिमेमा स्वतन्त्रता, विद्रोह र साहसको प्रतीक मानिन्छ । यही कारणले आन्दोलनरत युवाहरूले झन्डामा ‘जेन जी नेपो बेबिज’ लेखेर प्रदर्शन गरिरहेका हुन् । 

प्रदर्शनीमा सहभागी निर्जला थापा भन्छिन्,  ‘यसले अबको पुस्ता नेपोटिजम र पावरफुलहरूले मात्रै अवसर पाउने इन्जस्टिसविरुद्ध उठेको जनाउँछ ।’ उनी कलेजका साथीभाइसँग मिलेर झोलामा किताब, कपी बोकेर प्रदर्शनमा आइपुगेकी छन् ।