तर यो व्यक्तिगत घटना मात्र होइन । मानव बेचबिखन अनुसन्धान ब्युरोको तथ्यांकले भुजेलजस्तै नेपालका धेरै नागरिक यस्तै प्रलोभनमा परेका छन् । साउन महिनामा अवैध अंग प्रत्यारोपन मुद्दामा ब्युरोमा ४ जनाको मुद्दा दर्ता भएको थियो । साउन २२ र २३ मा एकएक र २७ गते दुईवटा मुद्दा दर्ता भएको ब्युरोका प्रवक्ता एवम् सूचना अधिकारी प्रहरी उपरीक्षक (एसपी) नरेन्द्र कुवरले जानकारी दिए ।

२०७६/२०७७ देखि २०८२/२०८३ सम्म ५ वर्षमा आइपुग्दा १ हजार ८८ वटा मुद्दा दर्ता भएका छन् । जसमध्ये १४ वटा मानव अंग झिक्ने कार्यका हुन् । एसपी कुँवरका अनुसार उजुरी परेकामध्ये भारत लगेर मिर्गौला बेच्न खोजेको र बेचिएका उजुरी छन् ।

'यसबाहेक बेचबिखनमा २०४, ओसारपसारमा ४७७, वेश्यावृत्तिमा ३७०, वेश्यागमनमा १ र मानव तस्करीमा २२ मुद्दा दर्ता भएका छन्,' कुँवरले भने । नेपालमा मानव तस्करीका कारण गरिबी, बेरोजगारी, शिक्षा–जागरूकताको कमी र दलालको प्रलोभन भएको उनको भनाइ छ । यद्यपि यसको कारोबार भने चिनजानको मान्छे र आफ्न्तको माध्यमबाट नै सुरु हुने उनले बताए ।