विराटनगर — मोरङको सुनवर्षी नगरपालिका–८ मा रहेको सरकारी खोप केन्द्रको जग्गा भारतीय महिलाको नाममा धनीपूर्जा बनाएर बिक्री गरेको खुलेको छ। तत्कालीन जनप्रतिनिधि, मालपोत कार्यालयका केही कर्मचारी र भूमाफियाको मिलेमतोमा सार्वजनिक सम्पत्ति कब्जा गरेर बिक्री गरिएको तथ्य बाहिर आएपछि नगरपालिका र मालपोत कार्यालय दुवैले छानबिन अघि बढाएका छन्।

स्थानीयका अनुसार वडा नम्बर ८ खडेवारीस्थित आधारभूत विद्यालय पछाडिको ७ कठ्ठा बढी ऐलानी जग्गामा रहेको खोप केन्द्र वर्षौँसम्म सामुदायिक खेलमैदानको रुपमा प्रयोग हुँदै आएको थियो। तर, क्रमशः विभिन्न व्यक्तिहरुले घर टहरा बनाउन थालेपछि सो जग्गा भारतीय नागरिक पदमादेवी गन्गाईको नाममा गलत तरिकाले धनीपूर्जा बनाई, उनीमार्फत विभिन्न ९ जनाको नाममा बिक्री वितरण गरिएको पाइएको छ।

स्थानीयवासीले यो घटना सार्वजनिक सम्पत्तिमाथिको ठुलो अतिक्रमण भएको भन्दै आक्रोश पोखेका छन्। उनीहरुका अनुसार खोप केन्द्र र खेलमैदान रहेको ऐलानी जग्गा पदमादेवीको नाममा २०७१ सालमै दर्ता भएको थियो । पदमाको माइती सोही क्षेत्रमा भए पनि उनी भारतमा विवाह भएकी भारतीय नागरिक हुन्। वडाध्यक्ष अनवर मियाँका अनुसार तत्कालीन जनप्रतिनिधि र मालपोत कार्यालयका केही कर्मचारीको मिलेमतोमा अवैध रुपमा धनीपूर्जा बनेर बिक्री गरिएको हो।

'खोप केन्द्र रहेको सरकारी जमिनलाई निजी स्वामित्वमा पुर्‍याउने कार्य अत्यन्त गैरकानुनी हो। अहिले नगरपालिका र वडा कार्यालय दुवै मिलेर सो जग्गा फिर्ता ल्याउने पहल भइरहेको छ,' मियाँले भने ।

यता मालपोत कार्यालय रंगेलीका प्रमुख सुनिल पौडेलका अनुसार सो जग्गा कित्ता नं. १६६ अन्तर्गत ऐलानी जमिनका रुपमा उल्लेख भए पनि कार्यालयका प्रमाणित फाँटवाला र प्रमुखको अनुमोदन नपाएको पाइएकाले धनीपूर्जा किर्तेगरी तयार पारिएको हुनसक्ने आशंका गरिएको छ।

कार्यालयको अभिलेखअनुसार २०७४ पुस २४ गतेको हालसाविक निर्णय अनुसार सो कित्ता नं. १६६, नयाँ कित्ता नं. १२२ बनेको छ। पदमादेवीले सो जग्गा वडा नम्बर ९ की रेखादेवी साहलाई राजिनामा पास गरेकी थिइन्, रेखादेवीबाट हाल विभिन्न ९ जनाको नाममा बिक्री भएको देखिन्छ।