काठमाडौँ — रसुवागढी नाकामा बाढीपहिरो आउने क्रम नरोकिएकाले भोटेकोशीमा बेलिब्रिज निर्माणको काम अघि बढ्न सकेको छैन भने नेपालतर्फको सडकको माथिल्लो भागबाट नितान्तै पहिरो आइरहेको छ । शनिबार बिहान सुख्खा पहिरो खसेका कारण टिमुरे–रसुवागढी खण्ड सडक अवरुद्ध भएको छ ।

सीमानजिकै गएको सुख्खा पहिरोले आवतजावतमा झन् समस्या भएको छ । बिहान गढीको माथिल्लो भागबाट अचानक ढुंगामाटो खस्न थालेको थियो । स्थानीयको भागाभाग भएको थियो ।

चीनले मितेरी पुलको आफ्नो भूभागमा बेलिब्रिजका लागि फाउन्डेसन तयार गरेको छ । तर भोटेकोशी तरेर आउन नसक्दा नेपालतर्फको बेलिब्रिजको फाउन्डेसन तयार गर्न सकेको छैन । केही दिनअघि नेपाल आउन भोटेकोशीमा बनाएको अस्थायी संरचनाका दुई वटा ह्युमपाइप बाढीले बगाएको थियो । अघिल्लो दिन बनाएको संरचना रातिको वर्षाले बगाएपछि भोलिपल्ट उताका चिनियाँ यता आउन सकेनन् । वर्षा नरोकिएसम्म बेलिब्रिज राख्ने सम्भावना न्यून रहेको सीमाका नेपाली अधिकारीहरूले बताएका छन् । असारको बाढीले मितेरी पुल नै बगाएपछि नेपाल–चीनको स्थलमार्गबाट हुने आवतजावत ठप्प छ ।

सशस्त्र प्रहरी बल इलाका कार्यालय टिमुरेका प्रहरी निरीक्षक कृष्ण धितालले पानी परेपछि पहिरो जाने र भोटेकोशीमा बाढी आउने गरेको बताए । गत असार २४ को बाढीपछि लगातार बाढीपहिरो आइरहेको छ । वर्षाले पहिरो जाने क्रम रोकिएको छैन भने भोटेकोशीमा बाढी आइरहेको छ । बाढीले मितेरी पुल बगाएपछि सरकारले चीनलाई बेलिब्रिज निर्माण गरेर यातायात सञ्चालनको वातावरण बनाइदिन अनुरोध गरेको थियो । चीनले मितेरी पुलको आफ्नो भूभागमा बेलिब्रिजको फाउण्डेशन तयार गरेर नेपालतर्फ आउन खोजेको हो । तर लगातारको बाढीले फाउन्डेसन बनाउन मेशिनरी सामान ल्याउन र मानिसको आवतजावत गर्न अवरोध सिर्जना भएको सीमाका सुरक्षाकर्मीले जानकारी दिएका छन् ।

रसुवा भन्सार अधिकृत खड्ग माझीले टिमुरेबाट सीमा क्षेत्र आउजाउ गर्न नसक्ने अवस्था रहेको बताए । उनले टिमुरेबाट २ किमि भन्सारतर्फ पहिरो गएको जानकारी दिए । असारको बाढीले रसुवा भन्सार नाकाबाट हुने कारोबार ठप्प छ । रसुवा नाका बन्द भएपछि चीनबाट हुने व्यापार तातोपानीतर्फ मोडिएको छ । तर तातोपानी नाकाको कोदारी खण्ड सडक वर्षाले भासिएकाले नियमित रूपमा यातायात सञ्चालन हुन सकेको छैन । गत जेठदेखि यातायात सञ्चालनमा कठिन भएकोमा अहिलेसम्म पनि सहज हुन सकेको छैन ।