पर्सा — वीरगन्ज महानगर क्षेत्रमा हैजा संक्रमितको संख्या १ सय १५ पुगेको छ । मंगलबार साँझ ६ बजेको सार्वजनिक गरिएको तथ्यांकमा महानगरमा संक्रमितको संख्या १ सय १४ थियो भने बुधबार बिहान ११ बजेको तथ्यांकमा १ संक्रमित थपिएर कूल संक्रमित संख्या १ सय १५ पुगेको हो ।

कूल संक्रमितमध्ये ३९ डिस्चार्ज भइसकेका छन् । ७६ जना अझै विभिन्न अस्पतालमा उपचाररत छन् ।

हालसम्म वीरगन्ज महानगरमा झाडापखाला र हैजाका ४ सय ९३ बिरामी अस्पतालमा भर्ना भएकोमा २ सय २७ डिस्चार्ज भएका छन् भने संक्रमितसहित २ सय ६६ उपचाररत छन्। जिल्ला स्वास्थ्य संकट व्यवस्थापन समितिका प्रवक्ता सुमनचन्द्र ठाकुरका अनुसार, हालसम्म भएको हैजाको पुष्टि आरडीटी परीक्षणबाट पुष्टि भएको हो । संक्रमित पुष्टि भएकाहरू वीरगन्ज महानगरपालिका वडा नं. ३, ११, १२, १३ र १६ का हुन् ।

नारायणी अस्पतालमा ४३ र तराई अस्पतालमा ३८ जना हैजा संक्रमित पुष्टि भएका छन् । नेसनल मेडिकल कलेजमा १५, भवानी, वीरगन्ज हेल्थ केयर र मंगलम प्याथोलोजीमा ३/३ जना संक्रमित पुष्टि भएका छन् । अली अर्थो र एडभान्स मेडिकेयर अस्पतालमा २/२ जनामा हैजा संक्रमण पुष्टि भएको छ । नारायणी सेन्टर, नेपाल इन्डो, नीलकण्ठ, नेपाल मेडिसिटी बयोधा, सर्वोत्तम र गण्डक अस्पतालमा पनि १/१ जना संक्रमित पुष्टि भएका छन् ।

पोखरिया अस्पतालमा पनि ३ संक्रमित उपचाररत

यता मंगलबार पोखरिया नगरपालिकास्थित पोखरिया अस्पतालमा भर्ना भई उपचाररत ४ जना हैजा संक्रमितमध्ये ३ जना अझै सोही अस्पतालमा उपचाररत छन् । तीमध्ये एक जना रिफर भई मंगलबार साँझ वीरगन्जस्थित वीरगञ्ज हेल्थ केयर अस्पतालमा भर्ना भएको र त्यहाँ बिरामीको संख्या नथपिएको जिल्ला स्वास्थ्य कार्यालय पर्साका अधिकृत जयमोद ठाकुरले बताए।