दार्चुला — नेपाल–भारत सीमा सुरक्षा अधिकारीहरूको बैठक दार्चुलामा सम्पन्न भएको छ । नेपाल–भारत सीमा सुरक्षासम्बन्धी १० औं डीआईजीस्तरीय ‘काउन्टरपार्ट’ समन्वय बैठक सम्पन्न भएको हो । सशस्त्र प्रहरी बल नेपाल र भारतको सशस्त्र सीमा बलका अधिकारीबीच समन्वय बैठकले सीमा स्तम्भ अभिलेख र मर्मत–सम्भारमा सहकार्य गर्ने सहमति भएको जनाइएको छ ।

सशस्त्र प्रहरी बल नेपाल नं. ७ वैद्यनाथ बाहिनी मुख्यालय कैलालीका बाहिनीपति प्रदीपकुमार पाल र भारत अल्मोडा सेक्टर मुख्यालयका डीआईजी सुधांशु नौटियाल, सेक्टर मुख्यालय पिलिभितका डीआईजी अनिलकुमार शर्मा लगायत नेपाल र भारतका उच्च सीमा सुरक्षा अधिकारीको उपस्थितिमा सीमा समन्वय बैठक भएको हो।

उक्त बैठकले दुवै देशका सीमा स्तम्भ अभिलेख तथा मर्मत–सम्भार गर्ने सहमति भएको छ। बैठकले दुई देशका सीमा क्षेत्रमा ध्वस्त वा हराएका सीमा स्तम्भहरूको मर्मत, संरक्षण र पुनर्निर्माणमा सहकार्य गर्ने सहमति गरिएको सशस्त्र प्रहरी बल नेपाल ४४ नम्बर गणका गणपति देवराज जोशीले जानकारी दिए। उनले सीमा क्षेत्रमा शान्ति, सुरक्षा र सौहार्दपूर्ण वातावरण कायम राख्ने विषयमा सहमति गरेको जनाए।

बैठकले दुवै देशका सुरक्षा निकायबीच आपसी समन्वय र सहकार्यलाई थप प्रभावकारी बनाउने प्रतिबद्धता जनाएका छन्। बैठकमा सीमा क्षेत्रमा हुने अवैध गतिविधि, चोरी, तस्करी, लागूऔषध ओसारपसार, मानव बेचबिखनलगायतका आपराधिक गतिविधि नियन्त्रण गर्ने विषयमा छलफल भएको हो।