विद्यालय शिक्षा विधेयकमा गरिएको पूर्ण छात्रवृत्तिको प्रावधान र निजी विद्यालयहरू क्रमशः गैरनाफामूलक हुनुपर्ने लगायतका प्रावधान हटाउनुपर्ने माग
काठमाडौँ — प्रतिनिधिसभा अन्तर्गतको शिक्षा, स्वास्थ्य, सूचना तथा प्रविधि समितिबाट बहुमतले पारित विद्यालय शिक्षा विधेयकका सम्बन्धमा निजी विद्यालय सञ्चालकहरूका संगठनले सभामुख देवराज घिमिरे र राष्ट्रिय सभा अध्यक्ष नारायण दाहाललाई चार बुँदे अनुरोपत्र बुझाएका छन् ।
प्याब्सन, हिसान, एनप्याब्सन, अपेनका पदाधिकारीले हस्ताक्षर गरेको पत्र प्याब्सनका पूर्वअध्यक्ष डीके ढुंगानाले सभामुख घिमिरे र अध्यक्ष दाहाललाई आइतबार सिंहदरबारमा भेटेर विद्यालय शिक्षा विधेयक सम्बन्धमा चार बुँदे अनुरोधपत्र बुझाएका हुन् ।
संसदीय समितिबाट पारित भएर प्रतिनिधिसभामा पेस भएको विद्यालय शिक्षा विधेयकका विभिन्न प्रावधानमा असन्तुष्टिका बुँदासहितको अनुरोधपत्र यी चार संगठनले सभामुख र राष्ट्रिय सभा अध्यक्षलाई बुझाएका हुन् ।
उनीहरूले विद्यालय शिक्षा विधेयकमा गरिएको पूर्ण छात्रवृत्तिको प्रावधान हटाउनुपर्ने, निजी विद्यालयहरू क्रमशः गैरनाफामूलक हुनुपर्ने प्रावधान हटाउनुपर्ने, एकीकृत छात्रवृत्ति पालिकाले वितरण गर्ने व्यवस्था हटाएर विद्यालयले नै दिने व्यवस्था राख्नुपर्ने लगायतका माग निजी विद्यालय सञ्चालकहरूले राखेका हुन् ।
