प्रतिनिधिसभामा उठेको प्रतिवेदनमा उपसभामुख इन्दिरा रानामगरको संस्था बालबालिका ओसारपसारमा संलग्न भएको आरोप लगाउँदै प्रतिवेदन सार्वजनिक गर्न माग गरिएको छ।
What you should know
काठमाडौँ — नेकपा (एमाले)का सचिव योगेश भट्टराईले बालबालिकाको अवैध ओसारपसारमा ‘पिए नेपाल’को समेत संलग्नता रहेको जाँचबुझ आयोगको प्रतिवेदन तत्काल सार्वजनिक गर्न माग गरेका छन् ।
प्रतिनिधिसभाको बिहीबारको बैठकमा बोल्दै उनले उपसभामुख इन्दिरा रानामगर तत्कालीन अवस्थामा कार्यकारी प्रमुख रहेको संस्था पिए नेपाल समेत बालबालिका ओसारपसारमा संलग्न रहेको भनी जाँचबुझ आयोगले प्रतिवेदन तयार पारेको भन्दै प्रतिवेदन सार्वजनिक गर्न माग गरेका छन् ।
उनले उपसभामुखको अविश्वासको प्रस्तावलाई संवैधानिक परिषद्को बहुमतसँग जोड्न आवश्यक नभएको बताए । उनले उपसभामुखको विषयलाई लिएर ‘इमोसनल ब्ल्याकमेलिङ’ गरेर विषयान्तर गर्ने कार्य गलत भएको बताए।
उनले भने, ‘२०७२ साल कात्तिक १७ गते बाल संगठनको सिफल बालगृहबाट पाँच जना बच्चाहरू हराउँछन्। ती बच्चाहरू कहाँ गए भनेर खोजी हुन्छ। त्यस सन्दर्भमा २०७२ माघ १८ गते सो कार्यालयका एक जना कर्मचारीले बाल कल्याण समितिमा दिएको बयानमा प्रिजनर्स असिस्टेन्ट (पिए) नेपालका मानिसहरूले जबरजस्ती लिएर गएका छन्। प्रिजनर्स असिस्टेन्ट नेपालको कार्यकारी अध्यक्ष त्यो बेला हालकी उपसभामुख इन्दिरा राना हुनुहुन्थ्यो। पछि उच्च अदालतका न्यायाधीशको अध्यक्षतामा गठित जाँचबुझ आयोगले एक प्रतिवेदन बनाएको छ। त्यो प्रतिवेदन तत्काल सार्वजनिक गर्न माग समेत गर्नुपर्छ। त्यो प्रतिवेदनमा समेत पिए संस्था बालबालिका तस्करीमा संलग्न रहेको भन्दै कारबाही गर्न भनेर समाचार आएको थियो। त्यो प्रतिवेदन सार्वजनिक गर्न सरकारसँग माग गर्दछु।’
उनले उपसभामुखको विदेश भ्रमण समेत संशयास्पद रहेको बताए । १७ पटक विदेश भ्रमण गर्दा सभामुखसँग ७ पटक मात्र स्वीकृति लिएर विदेश भ्रमण गरेको उल्लेख गर्दै यो विषयमा पनि छानबिन आवश्यक रहेको बताए ।
