उपसभामुखविरुद्ध पदअनुकुल आचरण नगरेको प्रस्ताव ल्याउन सत्तारुण दलहरूले हस्ताक्षर संकलन गरिरहेको अवस्थामा रास्वपाले संसदीय दलमा छलफल गर्ने भएको हो
काठमाडौँ — सत्तारुढ दलहरू कांग्रेस र एमालेले उपसभामुख इन्दिरा रानालाई पदबाट हटाउनका लागि आफ्ना सांसदका हस्ताक्षर संकलन अभियान चलाएसँगै राष्ट्रिय स्वतन्त्र पार्टीले आन्तरिक छलफलका लागि सांसदहरूलाई बोलाएको छ ।
सत्तारुढ दलहरू कांग्रेस र एमालेले उपसभामुख इन्दिरा रानालाई पदबाट हटाउनका लागि आफ्ना सांसदका हस्ताक्षर संकलन अभियान चलाएसँगै राष्ट्रिय स्वतन्त्र पार्टीले आन्तरिक छलफलका लागि सांसदहरूलाई बोलाएको छ ।
प्रतिनिधिसभाको बैठक बुधबार दिउँसो १ बजे बस्ने भएकाले रास्वपाले सबै सांसदहरूलाई नयाँ बानेश्वरस्थित दलको कार्यालयमा छलफलका लागि बोलाएको हो । १२ बजे सबै सांसदहरूलाई नयाँ बानेश्वर पुगिसक्न भनिएका रास्वपाका नेताहरूले जानकारी दिएका छन् ।
उपसभामुख राना रास्वपाकी समानुपातिक सांसद हुन् । उनलाई तत्कालीन माओवादी, एमाले, रास्वपा र राप्रपालगायतका दलको गठबन्धनले उपसभामुख बनाएको थियो ।
रास्वपाले उपसभामुख रानाविरुद्ध कांग्रेस र एमालेले पदअनुकुल आचरण नगरेको प्रस्ताव संसद्मा ल्याउने तयारी गरिरहेका बेला संसदीय दलमा छलफल गरेर रणनीति बनाउन लागेको हो । भिजिट भिसा प्रकरणमा संसद् बहिष्कार गर्दै आएको विषयबारे पनि छलफल हुने रास्वपाका नेताहरूले बताएका छन् ।
रास्वपा सांसद सोबिता गौतमले भनिन्, 'भिजिट भिसा प्रकरण आएसँगै प्रतिनिधिसभा बैठक बस्नुअघि संसदीय दलको बैठक बस्ने गरेको थियो । आज नयाँ विषय पनि आएकाले सांसदहरूलाई छलफलमा बोलाइएको छ । १२ बजे बस्ने बैठकमा यो विषयमा राम्रैसँग छलफल हुन्छ ।'
त्यस्तै, विद्यालय शिक्षा विधेयक लगायतका विषयमा पनि छलफल हुने बताइएको छ ।
