प्रधानमन्त्री ओलीको भारत भ्रमणको पूर्वतयारीका लागि भारतीय परराष्ट्र सचिव विक्रम मिस्री नेतृत्वको कूटनीतिक टोली भारतीय सैनिक बिजनेस जेट एम्ब्रेयरमा आइतबार काठमाडौँमा आउने भएको हो ।
काठमाडौँ — प्रधानमन्त्री ओलीको भारत भ्रमणको पूर्वतयारीका लागि भारतीय परराष्ट्र सचिव विक्रम मिस्री नेतृत्वको कूटनीतिक टोली आइतबार भारतीय सैनिक बिजनेस जेट एम्ब्रेयरमा आइतबार काठमाडौँमा आउने भएका छन् ।
उच्च स्रोतका अनुसार, भारतीय वायुसेवाको कूटनीतिक उडानलाई नेपाल नागरिक उड्डयन प्राधिकरणले मंगलबार अनुमति प्रदान गरेको हो ।
केही दिनअघि काठमाडौंस्थित भारतीय दूतावासले परराष्ट्र मन्त्रालयमार्फत कूटनीतिक उडानको अनुमति मागेको थियो । स्रोतका अनुसार, भारतीय वायुसेनाको बिजनेस जेट एम्ब्रेयर दिल्लीबाट आइतबार दिउँसो १ बजे काठमाडौं आइपुग्ने छ । उक्त विमान सोमबार दिउँसो मात्रै दिल्ली फर्किने छ ।
यस्तो कूटनीतिक उडानमा आउने यात्रुहरूको सेवा शुल्क बुझाउनुपर्छ । यो शुल्कबाहेक त्रिभुवन अन्तर्राष्ट्रिय विमानस्थलले ल्यान्डिङ, पार्किङ, न्याभीगेसनल शुल्कहरू मिनाहा गर्छ ।
प्रधानमन्त्री ओलीको भदौ ३१ गते भारत भ्रमणको तय भएको छ । मिस्रीले यसपटक भारतीय प्रधानमन्त्री नरेन्द्र मोदीको तर्फबाट ओलीलाई औपचारिक निमन्त्रणा पत्र हस्तान्तरण गर्ने भनिएको छ ।
द काठमाडौं पोस्टका अनुसार, भारतीय परराष्ट्र सचिव मिस्रीको यो वर्षको दोस्रो पटकको नेपाल भ्रमण हो । उनले प्रधानमन्त्री ओली, परराष्ट्रमन्त्री आरजु राणा देउवा, आफ्नो समकक्षी अमृत राईसहित उच्चस्तरीय नेताहरूसँग भेटवार्ता गर्ने कार्यक्रम छ ।
