काठमाडौँ — आठवर्षे चीन–जापान युद्ध अन्त्य भएको ८० वर्षको अवसरमा चिनियाँ दूतावासले काठमाडौंमा सांस्कृतिक प्रस्तुति र चित्रकला प्रदर्शनी गरेको छ । विद्यालयस्तरका विद्यार्थीबीच पाँच विधाको प्रतियोगितासमेत भएको छ । 

विद्यार्थीबीच नृत्य, गीत, चित्रकला, वक्तृत्वकला र भेषभूषामा गराइएको प्रतियोगितामा करिब एक दर्जन विद्यालयका विद्यार्थी सहभागी थिए । प्रतियोगिताका विजेतालाई शिक्षा, विज्ञान तथा प्रविधिमन्त्री रघुजी पन्त र नेपालका लागि चिनियाँ राजदूत छन सोङले पुरस्कार प्रदान गरे ।  

कार्यक्रममा मन्त्री रघुजी पन्तले नेपाल र चीनबीचको मैत्रीपूर्ण सम्बन्ध महत्त्वपूर्ण रहेको बताए । उनले एक चीन नीतिप्रति नेपालको प्रतिबद्धता पनि उल्लेख गरे । विकासशील र विकासोन्मुख मुलुकको विकासलाई चीनले आफ्नो विकास मानेर सहयोग गर्ने गरेको जनाउँदै मन्त्री पन्तले सराहना गरे । चीनको अदम्य महत्वाकांक्षाबाट नेपालले धेरै कुरा सिक्न सक्ने उनको भनाइ थियो । ‘शिक्षा र प्रविधिका क्षेत्रमा दुई मुलुकबीच वर्षौंदेखि सहकार्य भइरहेको छ । यो सहकार्य अझ विस्तार हुने विश्वास छ,’ उनले भने, ‘यसका लागि बीआरआई महत्त्वपूर्ण आधार बन्न सक्छ ।’