अमेरिका — संयुक्त राष्ट्र संघको आर्थिक तथा सामाजिक परिषद् (इकोसक)को अध्यक्षमा नेपालका  लोकबहादुर थापा निर्वाचित भएका छन् ।  राष्ट्र संघको इकाईहरूमध्ये महत्त्वपूर्ण मानिने आर्थिक तथा सामाजिक परिषद्‍मा नेपालको प्रतिनिधित्व गर्दै स्थायी प्रतिनिधि एवं राजदूत लोकबहादुर थापा सन् २०२५–२०२६ का लागि अध्यक्षमा निर्वाचित भएका हुन् । नेपाल राष्ट्र संघको इकोसकको अध्यक्ष बनेको यो पहिलो पटक हो । 

यसअघि सन् २०२४–२०२५ का लागि इकोसकमा थापा नै उपाध्यक्ष थिए । थापा दुई वर्षअघि स्थायी प्रतिनिधिको जिम्मेवारीसहित न्यूयोर्क आएका हुन् । उनी यसअघि बेल्जियम तथा ईयूका लागि राजदूतको भूमिकामा थिए । नेपालको अध्यक्षमा इकोसकको उपाध्यक्षमा अल्जेरिया, आर्मेनिया, डोमिनिकन रिपब्लिक र स्पेन निर्वाचित भएका छन् ।

अमेरिकाको न्युयोर्कस्थित राष्ट्र संघको मुख्यालय न्युयोर्कमा बिहीबार भएको बैठकमा परिषद्को नेतृत्वका लागि निर्वाचत प्रक्रिया भएको थियो । थापा निर्वाचित भएलगत्तै बैठकमा परिषद्का निवर्तमान अध्यक्ष क्यानाडाका स्थायी प्रतिनिधि बब रेले ग्याभल हस्तान्तरण गर्दै थापालाई अध्यक्षमा पदस्थापित गरेका थिए । अध्यक्षमा निर्वाचित भएपछि थापाले नेपाललाई यस महत्त्वपूर्ण भूमिकाका लागि दिएको विश्वास र समर्थनप्रति सबै सदस्य राष्ट्रप्रति कृतज्ञता व्यक्त गरे । उनले नेपालका लागि यो ऐतिहासिक अवसर भएको भन्दै इकोसकको अध्यक्षता गर्नु बहुपक्षीयताप्रतिको प्रतिबद्धता र निष्पक्ष, समावेशी, न्यायपूर्ण विश्व निर्माणमा योगदान गर्ने अभिलाषाको प्रमाण भएको दाबीसमेत गरे ।