काठमाडौँ — राष्ट्रिय स्वतन्त्र पार्टीको संसदीय दलको बैठक रुपन्देहीको भैरहवामा जारी छ । संघीय संसद् प्रतिनिधिसभामा रहेका रास्वपाका सांसदहरू संसदीय दलको बैठक बस्नका लागि रुपन्देहीको भैरहवा पुगेका हुन् । 

भैरहवामा बुधबार दिउँसो १ बजेदेखि जारी बैठकमा संगठनात्मक र संसदीय गतिविधिबारे छलफल भइरहेको सांसदहरूले जानकारी दिएका छन् । 

संसद्मा आउने विधेयकदेखि अन्य विषयवस्तुबारे सांसदहरूलाई अध्यावधिक गराउने उपायबारे बैठकमा छलफल भइरहेको हो । रास्वपा प्रवक्ता मनिष झाका अनुसार पार्टीको संगठनात्मक गतिविधि र संसद्मा आगामी दिनमा कसरी प्रस्तुत हुने भन्ने विषयमा छलफल भइरहेको हो । 

भैरहवाको होटल रमादामा जारी बैठकमा कार्यवाहक सभापति डीपी अर्यालले संगठनका विषयमा प्रस्ताव राखेका  थिए । 'बैठकमा वर्तमान समसामयिक राजनीतिक विषयमा एक-अर्कालाई जानकारी र अद्यावधिक गराउने एजेन्डा रहेका छन् । कार्यवाहक सभापतिबाट संगठनको वर्तमान गतिविधि, उद्देश्य, लक्ष्य, चौतर्फी आक्रमणबारे आएको प्रस्तावमा छलफल भइरहेको छ,' झाले भने, 'राष्ट्रिय स्वतन्त्र पार्टीबाट जारी हस्ताक्षर अभियानबारे संसदीय दलमा जानकारी गराइएको छ । त्यस्तै, संघीय संसद्मा राष्ट्रिय स्वतन्त्र पार्टीको उपस्थिती, सहभागिता र जारी विरोधबारे छलफल भइरहेको छ ।'

रास्वपाले प्रतिनिधिसभाको बजेट अधिवेशनमा भिजिट भिसाको विषय उठाएर अवरोध, विरोध र बहिष्कार गर्दै आएको छ । जेठ १३ यताका प्रतिनिधिसभाका कामकारबाहीमा रास्वपा सहभागी छैन ।