काठमाडौँ — राष्ट्रिय प्रजातन्त्र पार्टीका सचेतक विना लामाले भूमि विधेयक पारित गर्नका लागि सरकारले हतार गरिरहेको र त्यो कसको स्वार्थ पूरा गर्नका लागि हो भनी प्रश्न गरेकी छन् ।

सरकारले हतारमा पारित गर्न खोजिरहेको यो विधेयक ऐनका रूपमा कार्यान्वयनमा आएपछि नेपालमा सुकुम्बासी समस्या समाधान हुन्छ ? भनेर पनि उनले प्रशन गरेकी छन् । 

प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिको मंगलबारको बैठकमा राप्रपा सचेतक लामाले विधेयकमा गरिएका व्यवस्थाप्रति पार्टीको विरोध रहेको पनि बताइन् । 

सरकारले भूमि सम्बन्धी केही नेपाल ऐनलाई संशोधन गर्ने विधेयक,२०८२ संसद्मा ल्याएको छ । यो विधेयकलाई सरकारले संसदीय समितिमा छलफल नगराई संसद्बाट नै पारित गर्न खोज्नुपछिको स्वार्थ के हो भनेर सांसदहरूले प्रश्न उठाएका छन् । विधेयक जनताका समस्या समाधान गर्न नभई भूमिको दोहन गर्नका लागि भएको लामाको भनाइ छ । 'विधेयकमा गरिएका व्यवस्था जनतामुखी नभई दोहनमुखी र स्वार्थपरक रहेको देखिन्छ । सुकुम्बासी र अव्यवस्थगित बसोबासीका नाममा गौचर, हाटको सरकारी जग्गा बेच्ने उद्देश्य देखिन्छ,' लामाले प्रश्न गरिन्, 'नेपालमा सुकुम्बासीलाई जग्गा वितरण गरेको दशकौं भइसक्यो । न त जग्गा पाउने जग्गा धनी भए न त सुकुम्बासी समस्या समाधान भयो । यो ऐनअनुसार जग्गा वितरण गरेपछि नेपालमा सुकुम्बासी रहँदैनन् ?'