काठमाडौँ — मधेशका खेत सुक्खा र पोखरीको पानी सुकेको देखेँ : प्रधानमन्त्री ओली, पूर्वराष्ट्रपति भण्डारीले भनिन् - ‘आवेग र उत्तेजनाका भरमा निर्णय गरियो, म एमालेमै छु’, बागमतीमा मुख्यमन्त्री परिवर्तनको तयारी, लामालाई संसदीय दलको नेताबाट हटाउन हस्ताक्षर संकलन, प्यालेस्टाइनलाई स्वतन्त्र राष्ट्रको मान्यता दिने फ्रान्सको घोषणा, २२ औं पल्सर स्पोर्ट्स अवार्ड पोखरामा हुने लगायतका खबर आज चर्चामा रहे । देश–दुनियाँमा आज के के भयो त ?

पूर्वराष्ट्रपति विद्या भण्डारीले आफू अहिले पनि एमालेमै रहेको बताएकी छन् । राष्ट्रपतिको कार्यकाल पूरा गरिसकेपछि विधिपूर्वक पार्टीको सदस्यता नवीकरण गरेको उनले भनेकी छन् । ‘मैले सफलता पूर्वराष्ट्रपतिको कार्यकाल पूरा गरिसकेपछि बाँकी जीवन देशका लागि लगाउने उद्देश्यले मातृ पार्टी नेकपा एमालेको सदस्यता नवीकरण गरेकी हुँ,’ शुक्रबार काठमाडौंमा पत्रकार सम्मेलन गर्दै उनले भनिन्, ‘मैले विधिपूर्वक नवीकरण गरेको हुँ । केही व्यक्तिको हुलहुज्जत र उत्तेजनाको भरमा निर्णय हुँदैन । पार्टीको पनि आफ्नो विधि प्रक्रियाहरू हुन्छन् । एउटा प्रणालीमा चल्छ ।’

ooo

बागमती प्रदेशका मुख्यमन्त्री बहादुरसिंह लामालाई कांग्रेस संसदीय दलको नेताबाट हटाउन सांसदहरूले हस्ताक्षर संकलन गरेका छन् । उनलाई पार्टीको नेताबाट हटाउन सांसदहरूले शुक्रबार हस्ताक्षर बुझाएका छन् । कांग्रेस बागमती प्रदेश सभापति इन्द्रबहादुर बानियाँको सक्रियतामा संसदीय दलका ३७ जना सांसदमध्ये २१ जनाले हस्ताक्षरसहित उनीविरुद्ध अविश्वास प्रस्ताव दर्ता गरेका हुन् ।