काठमाडौँ — कास्कीका तत्कालीन मालपोत कार्यालय प्रमुखको सरुवा भएपछि बिचौलिया सुजन लामाले आफूलाई भेटेको भूमि व्यवस्था, सहकारी तथा गरिबी निवारणमन्त्री बलराम अधिकारीले स्वीकार गरेका छन् । घूस डिल गरेको प्रकरणमा सार्वजनिक पछिल्लो अडियोमा लामाले मन्त्री अधिकारीलाई भेटेको दाबी गरेका थिए ।

मन्त्रालयमा बिहीबार आयोजित पत्रकार सम्मेलनमा सुजन लामालाई कहिले र कुन प्रसंगमा भेट भएको हो भनी कान्तिपुरले गरेको प्रश्नको जवाफ दिँदै मन्त्री अधिकारीले मालपोत कार्यालयका प्रमुखको सरुवा सम्बन्धमा भेट भएको स्वीकार गरेका हुन् ।

'सुजन लामासँग मेरो भेट कहिले भयो भन्दाखेरि जुन उहाँले कुराहरू (अडियोमा) उठाउनुभएको छ  । जब कर्मचारी सरुवा भइसकेपछि, रामचन्द्र अधिकारीको सरुवा भइसकेपछि उसलाई थमाइदिनुपर्‍यो भनेर दुई-तीन जना मान्छे ल्याएर आउनुभएको थियो,' लामासँगको भेटमा भएका कुरा स्मरण गर्दै मन्त्री अधिकारीले भने, 'मैले प्रस्ट भने सरुवा भएको कर्मचारी थमौती हुँदैन । कर्मचारी प्रक्रियाबाट सरुवा भएको कुरा हो, जाने-आउने गर्छन् भनेको हो ।'

भूमि समस्या समाधान आयोगको कास्की अधयक्ष नियुक्तिको बेला नभई मालपोत कार्यालय प्रमुखको सरुवाको बेला भेट भएको मन्त्री अधिकारीको भनाइ थियो । 

मन्त्री अधिकारीले भने भूमि समस्या समाधान आयोग कास्की अध्यक्षमा खेमबहादुर पुनको नियुक्तिको सम्बन्धमा नभई मालपोत कार्यालय प्रमुखको सरुवाको सम्बन्धमा कुराकानी भएको दाबी गरेका हुन् । 

तत्कालीन सामान्य प्रशासनमन्त्री राजकुमार गुप्ता, बिचौलिया लामा र नागरिक उन्मुक्ति पार्टीका अध्यक्ष तथा सांसद रञ्जिता श्रेष्ठको कुराकानीको पहिलो अडियोमा पनि मन्त्री अधिकारीको नाम आएको थियो । दोस्रो अडियोमा बिचौलिया लामाले मन्त्री अधिकारीसँगको भेटमा भएको कुराकानी उल्लेख गरेका थिए ।

‘हिजो भूमिमन्त्रीसँग भेटघाट भएको थियो मेरो । तपाईं किन पहिल्यै नआएको ? तपाईंको नाममात्रै सुनेको हो मैले सुजन भाइ, तपाईं त मेरा सबै भाइहरूसँग नजिक, तपाईं त मेरो परिवार जस्तै रहेछ, तपाईं पहिला किन मसँग भेट्न आउनुभएन ? तपाईंले खेम पुन कि खेम पुन भनी अडान लिएको भए, यै कुरा पाँच दिन अगाडि भनेको भए म खेम पुनलाई गरिदिन्थें भनेर मन्त्रीले अनिल मरासिनीका अगाडि भन्नुभयो मलाई,’ अडियोमा लामाले भनेका छन् ।

लामालाई परिवारको मान्छे‍ भन्नुभएछ नि ? भन्ने प्रश्नको जवाफमा मन्त्री अधिकारीले एकै ठाउँ र परिवारलाई चिनजान रहेको भनेपछि त्यो शब्द बोलेको बताए । 'उहाँले आउँदाखेरि तपाईंका भाइलाई चिनेको छु, गाउँ यहाँ हो, यसोउसो भनेपछि पहिला त भेटघाटै भएको रहेनछ भनेको हो । सामूहिक रुपमा भनेको हो, हाम्रैतिरको हुनुहुँदो रहेछ । पहिला आएको भए हुन्थ्यो भनेको हो । उहाँको टिमसँगै भनेको हो,' मन्त्री अधिकारीले लामासँगको भेटमा भएका कुराबारे थप प्रस्ट पारे ।

मालपोत कार्यालय प्रमुख अधिकारीले लामा लगायतको काम गरिदिन्छु भनेर प्रतिबद्धता जनाएपछि आफूलाई भेट्न आएको हुनसक्ने मन्त्री अधिकारीको भनाइ थियो । कसले के गरेको छ ? भन्ने कुरा आफूलाई थाहा नरहेको पनि मन्त्री अधिकारीले बताए । स्वार्थ पूरा नभएपछि आफूलाई त्यो प्रकरणमा मुछ्ने काम भएको हो कि भन्ने मन्त्री अधिकारीको दाबी छ ।    

घूसमा आफ्नो मन्त्रालय र छोरालाई जोडेकोमा भने मन्त्री अधिकारीले आपत्ति जनाएका छन् । सार्वजनिक अडियोमा बोल्ने व्यक्तिहरूसँग आफ्नो सरोकार नभएको पनि उनको भनाइ थियो । 'मन्त्रीले भ्रष्टाचार गरेर खायो भनेर आएको छ । मेरो छोराको नाम पनि छन् । त्यहाँ मेरो चरित्र हत्या गर्न गरेको कुप्रयास हो । मैले भनेको नमानेपछि आफ्नो अभिष्ट पूरा गर्नको लागि मेरो र मेरो परिवारको चरित्र हत्या गर्ने प्रयास गरिएको छ,’ उनको भनाइ थियो । 

बिचौलिया लामाले भने न्युजिल्यान्डमा बस्ने मन्त्री अधिकारीका छोरा मनोज नेपाल आएर घूसको ‘सेटिङ’ मा संलग्न भएको अडियोमा बोलेका छन् । बुबा मन्त्री बनेपछि उनी नेपाल आएको भनिएको छ । प्रकाश दाहाल, आर्यन शर्मालगायतका बिचौलिया समूहले मन्त्री अधिकारी र उनका छोरा मनोज पोखरा पुगेको बेला प्रभावमा पारेर पैसाको चलखेल गरी मालपोत कार्यालय प्रमुख रामचन्द्र अधिकारीलाई सरुवा गरेको अडियोमा भनिएको छ । रामचन्द्रलाई कास्कीबाट लमजुङ सरुवा गरिएको थियो ।

मन्त्री अधिकारीलाई मालपोत कार्यालय प्रमुख रामचन्द्र अधिकारीले ललितपुरस्थित मन्त्री क्वाटरमा पुगेर ३२ लाख रकम बुझाएको पनि अडियोमा भनिएको छ । ‘रामचन्द्रलाई जेब्रा झोलामा ३२ लाख रुपैयाँ दिएको हो, नोट नम्बर सबै टिपेर । उसले लगेर बुझायो । मैले ट्रस्ट मनोजलाई गर्ने हो । मनोज साथी हो, मनोजले पुष्टि गर्‍यो, हो भन्यो । रामचन्द्रले बुझाएकै हो भन्ने थाहा छ किनकि म आफैं बाइकमा थिएँ । उसलाई भित्र पठाएँ, म बाहिर थिएँ । ऊ मन्त्री क्वार्टरबाट खाली आयो । उसले मन्त्री क्वार्टरको दुलोमा लुकाएन होला,’ लामाले अडियोमा भनेको सुनिन्छ । मन्त्री अधिकारीले भने यी सबै आफ्ना काम नभएपछि लगाइएका आरोप भएको बताएका छन् ।

भूमि मन्त्रालयका तत्कालीन सचिव अर्जुन पोखरेलले पनि पाँच लाख रुपैयाँ घूस लिएको अडियोमा दाबी गरिएको छ । त्यस सम्बन्धमा आफू जानकार नरहेको मन्त्री अधिकारीले बताए ।

घूस प्रकरणको छानबिनका लागि आफू खुला रहेको पनि मन्त्री अधिकारीले बताए । तर, पदबाट राजीनामा दिने कि नदिने भन्ने प्रश्नको जवाफमा भने, 'कसैले आरोप लगाएकै भरमा, भोलि म फलानाले यसो गर्‍यो उसो गरिदियो भनौला त यहाँ को बाँकी रहन्छ  ।'