जेठ १३ मा पक्राउ पुर्जी लिएर जिल्ला प्रहरी परिसर काठमाडौंमा पत्र पठाइए पनि उनी सम्पर्कविहीन
रौतहट — ठगी आरोपमा जिल्ला अदालत रौतहटले पक्राउ पुर्जी जारी गरेको एक महिना बितिसक्दा पनि काठमाडौंस्थित नापी कार्यालय डिल्लीबजारअन्तर्गत टोखा टोली प्रमुख सञ्जय साह पक्राउ पर्न सकेका छैनन् ।
इलाका प्रहरी गरुडाले अदालतबाट ठगी मुद्दा दर्ता गरी साहको नाममा गत जेठ १३ मा पक्राउ पुर्जी लिएर जिल्ला प्रहरी परिसर काठमाडौंमा पत्र पठाए पनि अहिलेसम्म उनी पक्राउ परेका छैनन् ।
ठगी आरोपमै प्रहरीले नापी प्रमुख साह, दुर्गाभगवती गाउँपालिकाका पूर्वअध्यक्ष अरुण साह, काठमाडौं नागार्जुन–४ का विमलादेवी श्रेष्ठ र छोरा धीरज श्रेष्ठविरुद्ध पनि अदालतबाट पक्राउ पुर्जी लिइएको इलाका प्रहरी गरुडाका डीएसपी राजन कार्कीले बताए । गरुडा नगरपालिका–६ पोठियाहीका सन्तोषकुमार चौधरीले जग्गासम्बन्धी कारोबारमा रकम ठगी गरेको आरोपमा उनीहरुविरुद्ध प्रहरीमा जाहेरी दिएका थिए ।
नेपाल प्रहरी प्रवक्ता डीआईजी विनोद घिमिरले नापी प्रमुख साह अहिलेसम्म पक्राउ नपर्नुको कारण काठमाडौं प्रहरीमा बुझ्ने बताए । ‘किन पक्राउ परेनन् भन्ने विषयमा म बुझ्छु,’ उनले भने, ‘वास्तविकता के हो, पक्राउ पुर्जी मगाएर यस विषयमा गम्भीर भएर हेर्छु ।’
पक्राउ पुर्जी पाएर पनि जिल्ला प्रहरी परिसर काठमाडौं चुप बसेको पीडित चौधरीले गुनासो गरेका छन् । प्रहरी महानिरीक्षक दीपक थापाले नापी प्रमुख साहलाई पक्रन निर्देशन दिइसकेको दाबी गरे ।
जग्गा बैना गरेर खरिद, बिक्रीमा टोखा नापी प्रमुख साह सहितका मानिस जोडिएपछि गरुडा प्रहरीले ठगी मुद्दा दर्ता गरी अदालतबाट पक्राउ पुर्जी लिएको हो । पीडित चौधरीले जग्गा खरिद गर्न १ करोड १० लाख पैसा जम्मा गरेको प्रमाण प्रहरीसमक्ष पेस गरेका छन् । जग्गा खरिद बिक्रीमा बदनियत देखिएकाले ठगीमा अनुसन्धान अघि बढाएको प्रहरीको भनाइ छ ।
नापीका प्रमुख साह असार १५ सम्म बिदामा बसेको थिए । नापी कार्यालय डिल्लीबजारका निमित्त प्रमुख प्रकाश ओलीले टोखा प्रमुख साहको बिदा सकिए पनि उनी सम्पर्कमा नरहेको जानकारी दिए । ‘१५ दिनको बिदा सकिए पनि साह सम्पर्कमा छैनन्,’ उनले भने, ‘बिदा सकिएर साह कार्यालय आएका छैनन् ।’ टोली प्रमुख साहविरुद्ध पक्राउ पुर्जी जारी भएको र साहलाई प्रहरी कार्यालय हाजिर हुन भनेर पत्र आएको ओलीले जानकारी दिए ।
दुर्गाभगवतीका पूर्वअध्यक्ष साहले १० लाख लिएको र पीडितलाई फिर्ता गरिसकेको प्रहरीले जनाएको छ ।
रौतहटकै चन्द्रपुरस्थित नापी कार्यालयमा २०७८ मा प्रमुख हुँदा अकुत सम्पत्ति कमाएको आरोप पनि नापी प्रमुख साहमाथि लागेको थियो । तर त्यसमा अनुसन्धान भएको छैन । त्यसैबेला नापी प्रमुख साह र चौधरीबीच चिनजान भएको थियो । त्यसपछि काठमाडौंको नागार्जुन–४ का विमलादेवी श्रेष्ठको सर्लाही हरिपुर नगरपालिका–७ मा रहेको कित्ता नम्बर ७७३ को ११ कठ्ठा १४ धुर जमिन संयुक्त लगानीमा खरिद गर्ने सहमति भएको चौधरीले सुनाए ।
सुरुमा चौधरीले १ करोड १० लाख बैना गरेका थिए । रजिस्ट्रेसन पास गराउन पैसा अपुग भएपछि प्रमुख साहले लगानी गरी आफ्नो नाममा जग्गा ल्याएका थिए । उनका अनुसार २ करोड मूल्यमा उक्त जमिन किनबेच भएको थियो । उक्त जमिन साहले साझेदार भनिएका चौधरीलाई थाहै नदिई ०८०/०८१ मा चार कित्ता बनाई चार जनालाई बिक्री गरेपछि ठगीको आरोपमा प्रहरीमा जाहेरी परेको हो ।
प्रहरीले जग्गाधनी विमला श्रेष्ठको मृत्यु भइसकेको जानकारी पाएपछि छोरा धीरजलाई पक्राउ गरेर हाजिरी जमानीमा छाडेको थियो ।
