काठमाडौँ — प्रमुख प्रतिपक्षी माओवादीका उपमहासचिव तथा सांसद वर्षमान पुनले सरकारले भिजिट भिसा प्रकरण र त्रिभुवन विमानस्थल अध्यागमनको छानबिन गर्न गठित उच्चस्तरीय छानिबन तथा अध्ययन समितिको निगरानी गर्ने बताएका छन् । 

प्रतिनिधिसभाको मंगलबारको बैठकमा पुनले भिजिट भिसासम्बन्धी देखिएका समस्या अध्ययन तथा छानबिन निष्पक्ष, पारदर्शी, प्रमाण र तथ्य संगत होस् भन्ने अपेक्षा रहेको बताए । उनले उक्त प्रकरणहरूमा ट्राभल एजेन्सी, म्यानपावर, एयरलाइन्सदेखि कुटनीतिक नियोगका पदाधिकारीसमेत जोडिएको सार्वजनिक भइसकेको बताउँदै त्यसको छानबिनलाई निगरानी गरिने बताए ।

'यस्ता प्रकरणमा ट्राभल एजेन्सी, म्यानपावर, एयरलाइन्स, कैयौँ सन्दर्भमा राष्ट्रिय, अन्तर्राष्ट्रिय नियोग त्यसमा रहेका पदाधिकारी पनि संलग्न छन् भन्ने मिडियामा आएको छ । यी सबै कुराको उच्चस्तरीय छानबिन समिति अध्ययन र छानबिन गर्नेछ,' उनले भने, 'राज्यका निकायमा देखिएका समस्या, विगतदेखि वर्तमानसम्म के हुन् ? कसरी हुन् ? कहाँनिर यो ग्रे एरिया छ, जसले गर्दा विभिन्न अपराधहरू हुने गरेका छन्, यो कुरामा सत्य तथ्य ढंगले अध्ययन गरोस्, छानबिन गरोस्, जनताको भावनाअनुसार सुझाव तथा प्रतिवेदन प्रस्तुत गरोस्, हाम्रो अपेक्षा छ । यसमा गम्भीर ढंगले छानबिन भएन र अविश्वासहरू पैदा भए निश्चय पनि सार्वजनिक रूपमा जनताले निगरानी गरिरहेको छ । आलोचना हुन्छ । प्रमुख प्रतिपक्षी दलको तर्फबाट पनि निगरानी, खबरदारी गरिराख्नेछौँ ।'