त्यसमाथि सुनुवाइ गर्दै विशेषमा भएका दुई इजलासका ६ न्यायाधीश नै सम्मिलित इजलासले उक्त मुद्दालाई फौजदारी लागतमा राख्न आदेश गरेको हो । अवहेलनाको मुद्दा फौजदारी लगतमा राखिए त्यसबापत हुने दण्ड फौजदारी प्रकृतिको हुन्छ जसबापत जेलको सजाय गर्ने सुविधा अदालतलाई हुन्छ । तीन दिनभित्र इजलासमा आउने आदेशका साथै अदालतले ‘प्रकाशित र प्रसारित गरिएको समाचार सामग्री जे जुन अवस्थामा छ, सोही अवस्थामा राख्नू’ भनेर पनि आदेश गरेको छ ।

‘निवेदन/प्रतिवेदन मागबमोजिम यस अदालतको अवहेलनामा किन कारबाही र सजाय हुनु नपर्ने हो ?,’ विशेषले आदेशमा भनेको छ, ‘यस अदालतको अवहेलनामा कारबाही र सजाय हुनु नपर्ने भए सोको आधार कारण र प्रमाणसहित यो आदेश र समाह्वान म्याद प्राप्त भएको मितिबाट बाटोको म्‍यादबाहेक तीन दिनभित्र र सो म्याद थाम्न थमाउन समेत नपाउने गरी दृष्टि मिडिया प्रालिको हकमा कानुन बमोजिमको प्रतिनिधि र विपक्षीहरू शम्भुलाल श्रेष्ठ, एमपी सुब्बा तथा सम्बन्धित समाचारको संवाददाताको हकमा आफैं यस अदालतसमक्ष बयान गर्न उपस्थित हुनू ।’