सुरक्षाका कारण तेहरान छोडेका ७ नेपाली पुनः तेहरान फर्किए
काठमाडौँ — इरानको राजधानी तेहरानमा भएका १७ जना नेपालीमध्ये ११ जनालाई भारतीय दूतावासले उद्धारका लागि आइतबार तेहरानबाट उत्तरी सहर मशहद लैजाने भएको छ ।
भारतीय दूतावासले आइतबार बिहान ७ बजे तेहरानबाट बसबाट कोम हुँदै मशहद लैजाने तयारी गरेको छ । तेहरान छाडेका ७ जना नेपाली शनिबार बेलुकासम्म पुन: तेहरान फर्किँदै छन् ।
‘हामी ११ जना नेपालीलाई आइतबार बिहानै जम्मा हुन तेहरानको स्थानीय ठेगाना दिइएको छ,’ तेहराइनमा कार्यरत हरि थापाले ईकान्तिपुरसँग भने, ‘त्यहाँबाट हामीलाई मशहद पुर्याइनेछ । सम्भवत मादबाट हामीलाई विमानबाट भारत उडाइनेछ ।’
उनले तेहराइनबाट कोमसम्म पुग्न कम्तीमा बसबाट साँढे दुई घन्टा लाग्ने बताए । त्यहाँबाट मशहद पुग्न झन्डै १२ घण्टा लाग्ने उनले बताए । अहिले भारतीय दूतावासका अधिकारीहरु मशहदमा बसेर भारत पठाउने कार्य भइरहेको छ ।
आइतबार नै तेहरानबाट उद्धार गर्ने भएपछि तेहरान छोडेर अर्को सहर गएका ७ जना नेपाली शनिबार पुन: तेहरान फर्किँदै छन् । उनीहरूले बुधबार तेहरान छाडेका थिए ।
आइतबार तेहरानबाट मशहद जानेहरूमा उदयपुरका हरि थापा, उनका छोरा उत्सव थापा, उनका श्रीमती गायत्री कार्की थापा रहेका छन् ।
त्यस्तै, बुटवलका विष्णु भुसाल, बुद्धिसागर पौडेल, गणेश पोखेरल, सुमन गैरे, विष्णुप्रसाद बन्जाडे, यज्ञ मरासिनी र राजु खनाल रहेका छन् । उनीहरू ८ देखि २४ वर्षसम्म तेहरानमा रहेका विभिन्न दूतावास र इरानी रेस्टुरेन्टका काम गर्दै आएका छन् ।
‘मेरो बिदामा जान भनेर असार १ गते नै टिकट काटिसकेको थिएँ । त्यसको दुई दिन अगाडिबाट नै इजरायलले इरानमा आक्रमण गरेपछि युद्ध सुरु भयो,’ १६ वर्षदेखि इरानी रेस्टुरेन्टमा सेफको काम गर्दै आएका बुटवलका गणेश पोखरेलले ईकान्तिपुरसँग भने, ‘अहिले पनि म बसेको ठाउँ सुरक्षित नै हो । यहाँ भइरहेको आक्रमण टिभीमै हेर्दा मात्रै थाहा हुन्छ । बाहिर मान्छेहरू हिँडडुल नै गरिरहेका छन् । बेला बेला मिसाइल पड्केको आवाज आइराख्छ ।’
इरानी जेलमा भएका ५ जना नेपालीलाई उद्धार गर्ने दिन भने तोकिएको छैन । दोहास्थित नेपाली दूतावासले ३ जनाको ट्राभल डकुमेन्ट पठाइसेको छ । दुई जनासँग राहदानी साथमै छ ।
दोहास्थित नेपाली दूतावासले दाङका गोविन्द डाँगी, मदन डाँगी र पुष्कर खत्रीको ट्राभल डकुमेन्ट पठाएको हो । महेश डाँगी र बालकृष्ण खड्काको साथमै राहदानी छ । उनीहरू डेढ महिना अगाडि इरानको आवासीय कानुन उल्लंन गरेको भन्दै प्रहरीले पक्राउ गरेको थियो । अदालतले उनीहरूलाई स्वदेश फर्काउन आदेश जारी गरिसकेको छ ।
परराष्ट्र मन्त्रालयले इरानमा रहेका नेपाली नागरिकको उद्धार गर्न भारत सरकारलाई आग्रह गरेको थियो ।
परराष्ट्रमन्त्री डा. आरजु राणा देउवाले इरानमा रहेका १६ जना नेपालीको उद्धारका निम्ति भारत सरकारसँग अनुरोध गरेको जानकारी दिँदै भारत सरकार सकारात्मक रहेको बताएकी थिइन् ।
‘इरानमा केही नेपाली हुनुहुन्छ । आफ्ना नागरिकहरूको उद्धार गर्दा नेपालीहरूको पनि उद्धारका निम्ति मैले भारत सरकारसँग आग्रह गरेकी छु,’ उनले भनिन्, ‘हामी भारतबाट सकारात्मक जवाफ आउनेमा विश्वस्त छौँ’
