काठमाडौँ — चिनियाँ संगठित गिरोहसँग मिलेर सुन तस्करी गरेको अभियोगमा फरार रोल्पाकी माओवादी नेतृ अमला रोक्का पक्राउ परेकी छन् । माओवादी निकट रोल्पा–काठमाडौं सम्पर्क मञ्चकी पूर्व उपाध्यक्षसमेत रहेकी रोकालाई शुक्रबार प्रहरीको केन्द्रीय अनुसन्धान ब्युरो (सीआईबी) ले काठमाडौंको टोखाबाट पक्राउ गरेको हो ।

उनीविरुद्ध त्रिभुवन अन्तर्राष्ट्रिय विमानस्थल हुँदै भेपलगायत उपकरणमा लुकाएर ल्याएको र २ साउन २०८० मा सिनामंगलबाट बरामद तस्करीको करीब ६१ केजी सुन प्रकरणमा जिल्ला अदालत काठमाडौंमा मुद्दा विचाराधीन छ ।

भेपमा तस्करी गरेर ल्याएको सुनको अनुसन्धान सुरु भएपछि उनी फरार भएकी थिइन् । सुनको अनुसन्धान सुरु भएपछि पूर्वउपराष्ट्रपति नन्दबहादुर पुनको घरमा ‘सेल्टर’ लिएर बसेकी उनी त्यहीँबाट भागेकी थिइन् । त्यसपछि उनी पश्चिम नेपालको बाटो भएर भारत पुगेको अनुसन्धानबाट खुले पनि पक्राउ पर्न सकेकी थिइनन् । त्यसपछि सीआइबीले इन्टरपोलमार्फत डिफ्युजन नोटिस जारी गरेर पनि खोजी गरेको थियो ।

उनी फरार रहेकै अवस्थामा सीआईबीको अनुसन्धान प्रतिवेदनका आधारमा जिल्ला सरकारी वकिल कार्यालय काठमाडौंले २९ जनालाई प्रतिवादी बनाएर ३ अर्ब ५० करोड ३० लाख ९१ हजार ९ सय ७५ रुपैयाँ बिगो कायम गरी ३१ भदौ २०८० मा मुद्दा दायर गरेको थियो । सीआईबीका एसएसपी होबिन्द्र बोगटीले रोक्का विरुद्धको मुद्दा विचाराधीन रहेकाले उनलाई आइतबार कार्यालय समयमा जिल्ला अदालत काठमाडौंमा पेस गरिने बताए । समय अभावका कारण शुक्रबार अदालत पेस गर्न नसकिएको उनको भनाइ छ ।

तिब्बती मूलका बेलजियन नागरिक दावा छिरिङले माओवादी सम्बद्ध रोक्कासँग विवाह गरेसँगै यो नेटवर्कमा माओवादीका केही नेता पनि जोडिएका थिए । दावा छिरिङ सुरुमा तिब्बती शरणार्थी बनेर नेपाल भित्रिएर त्यसपछि रोक्कासँग विवाह गरी सुन तस्करीको धन्दा चलाएको अनुसन्धानबाट खुलेको थियो ।