काठमाडौँ — ललितपुरस्थित सदर चिडियाखानामा भाले गैंडा ‘माइला’लाई ल्याइएको छ । चितवन राष्ट्रिय निकुञ्जबाट २३ महिनाको ‘माइला’ नाम दिइएको गैंडा नयाँ सदस्यका रूपमा चिडियाखानामा थपिएको हो । अब चिडियाखानामा दुई वटा गैंडा हेर्न पाइने भएको छ ।
बर्दिया राष्ट्रिय निकुञ्जमा २०८१ असोजमा बाघको आक्रमणबाट माउसँग बिछोडिएपछि टुहुरो बनेको माइलालाई सौराहास्थित राष्ट्रिय प्रकृति संरक्षण कोष कार्यालयमा हुर्काएर सदर चिडियाखाना ल्याइएको चिडियाखानाका सिनियर क्युरेटर अशोक सुवेदीले बताए ।
'माइलासँगै पोथी पूजालाई पनि चिडियाखाना ल्याउने कार्यक्रम थियो,' उनले भने 'पूजा ट्रकभित्र रहेको खोरमा पस्न नमान्दा समस्या भयो ।' बुधबार पूजालाई बेग्लै प्रबन्ध गरी ल्याइएको उनले बताए । करिब ३ वर्षकी पूजा २०७९ मा बाघको आक्रमणबाट चितवन निकुञ्जमा माउसँग बिछोडिएको थिई ।
एनटीएनसीद्वारा सञ्चालित जावलाखेल सदर चिडियाखानामा रहेका दुई गैंडामध्ये एउटा ६ महिनाअघि बिरामी भएर मृत्यु भएको थियो । त्यसपछि माइला र पूजालाई ल्याइएको हो ।
