काठमाडौँ — गत चैत १५ गते काठमाडौंको तीनकुनेमा राजतन्त्र पक्षधरहरूको हिंसात्मक प्रदर्शनमा संलग्न भएको आरोपमा मुद्दा लागेकाहरुमध्ये अदालतमा उपस्थितहरुको बयान सकिएको छ । जिल्ला अदालत काठमाडौंका न्यायाधीश ध्रुवराज कार्कीको इजलास २६ मा बयान सकिएपछि अहिले थुनछेक बहस सुरू भएको जिल्ला अदालतका सूचना अधिकारी दीपककुमार श्रेष्ठले जानकारी दिए ।

‘सरकारी वकिलको कार्यालयले प्रसाईँसहित ५० र ११ जनाको छुट्टाछुट्टै अभियोग पत्र बनाएर मुलुकी फौजदारी कार्यविधि संहिता, २०७४ को दफा ३२ बमोजिम ११ जेठमा मुद्दा दायर भएको थियो । त्यसमध्ये आपराधिक उपद्रव अन्तर्गत ११ जना यसअघि नै धरौटी माग गरेर छाडिएको छ । ५० जनामध्ये उपस्थितहरुको बयान सकिएर आजदेखि थुनछेक बहस सुरू भएको हो’, श्रेष्ठले भने,‘सरकारी वकिलले थुनछेक गरेपछि प्रतिवादी र वादीहरुले थुनछेक बयान दिनेछन् ।’

उनका अनुसार ५० जनाविरूद्ध मुद्दा दायर भएपनि अदालतमा ३९ जना मात्रै उपस्थित भएका थिए । अहिले उपस्थितहरुको बयान सकेर थुनछेक बहस सुरु भएको छ ।

राप्रपा वरिष्ठ उपाध्यक्ष रवीन्द्र मिश्र, राप्रपा महामन्त्री एवम् सांसद धवल शम्शेर राणा लगायत हाजिरी जमानीमा छुटेका ११ जना अहिले सम्पर्कमा छैनन् ।

जिल्ला प्रहरी परिसर भद्रकाली काठमाडौंमा कार्यरत प्रहरी नायब उपरीक्षक प्रल्हाद कार्की, प्रहरी निरीक्षक वाङ्गेल लामा, पप्पुकुमार दास, प्रहरी वरिष्ठ नायब निरीक्षक विष्णु खतिवडा, विजय शाही, प्रहरी नायब निरीक्षक अर्जुन सेठ्ठी, प्रहरी वरिष्ठ हवल्दार विष्णु सापकोटासमेतको जाहेरीले नेपाल सरकार वादी र दुर्गा प्रसाईंसमेत ५० जनालाई प्रतिवादी बनाएर राजद्रोह, आपराधिक उपद्रव, कर्तव्य ज्यान, ज्यान मार्ने उद्योग र संगठीत अपराधमा मुद्दा दायर भएको थियो । हिंसात्मक प्रदर्शनमा संलग्न भएका उनी बाहेकका चार बालकविरुद्ध पनि बाल अदालतमा मुद्दा दायर गर्ने तयारी चलिरहेको छ ।