काठमाडौँ — राष्ट्रिय स्वतन्त्र पार्टीकी सांसद चन्दा कार्कीले राज्यका हरेक अङ्गमा सत्ताको लाजमर्दो भागबण्डा चलिरहेको टिप्पणी गरेकी छन्।

प्रतिनिधिसभाको बुधबारको बैठकमा विनियोजन विधेयकका सिद्धान्त र प्राथमिकतामाथिको छलफलमा भाग लिँदै सांसद कार्कीले न्यायालय, विश्वविद्यालय, प्रहरी, संवैधानिक निकाय, राजदूत र राष्ट्र बैंक जस्ता संस्थामा मेरिट र काबिलियतको कदर नगरेको आरोप लगाएकी थिइन्।

उनले प्रत्येक वर्षको नीति तथा कार्यक्रममा कृषि, ऊर्जा, शिक्षा र स्वास्थ्य क्षेत्रलाई प्राथमिकता दिने प्रतिवद्धता दोहोरिने भए पनि कार्यान्वयन नहुने प्रवृत्ति दोहोरिएको उल्लेख गरlन्। भाषण र घोषणामा सीमित नभई ठोस परिणाम दिने दिशामा अघि बढ्नुपर्नेमा उनले जोड दिएकी थिइन्।

उनले भनिन्, 'ज्युँदै नेपाल आमालाई चिथोरेर राज्यका हरेक अङ्गमा सत्ता र शक्तिको लाजमर्दो भागबन्डा चलिरहेको छ। न्यायालय, विश्वविद्यालय, प्रहरी, संवैधानिक निकाय, राजदूत, राष्ट्र बैंक—कहीँ पनि मेरिट र काबिलियतको कदर छैन। यस्तो अवस्थामा आदर्शका मिठा कुरा गरेर नीति कार्यक्रममा छलफल गर्नुको के नै अर्थ रहन्छ र? हरेक वर्षको सिद्धान्त र प्राथमिकतामा कृषि, ऊर्जा, स्वास्थ्य र शिक्षालाई प्राथमिकता दिइएको प्रतिवद्धता जाहेर गरिन्छ। तर ती प्रतिवद्धता कहिल्यै कार्यान्वयनसम्म पुग्न सकेका छैनन्।'