उनले दुईतिहाइको सरकारले विधेयकमार्फत कानुन बनाउनुपर्ने बेला अध्यादेशको साहारा लिएका कारण पार्टीकै नेताहरू विरोधमा उत्रिनु परेको पनि स्पष्ट पारे । ‘संसद्बाट विधेयक लैजानु पर्ने ठाउँमा अध्यादेश आएपछि हामीजस्ता सांसदहरूले औंला ठड्याउनुपर्ने बाध्यता आयो,’ उनले भने, ‘किन आयो भन्दा दुईतिहाइ बहुमत छ । प्रजातान्त्रिक मूल्य–मान्यताको कुरो छ । हामी दुईतिहाइ बहुमतको सरकारमा छौँ र सरकारमा रहेकाहरू बोलेनन् भने प्रतिपक्षसँग त त्यो तागत नै छैन ।’

प्रतिपक्षीसँग शक्ति नरहेको र शक्ति नभएको प्रतिपक्षले प्रजातन्त्रको सुरक्षा गर्न नसक्ने उनको भनाइ थियो । 

उनले १४ औँ महाधिवेशनको म्यान्डेडअनुसार पार्टीको विभिन्न जिम्मेवारीमा पुगेका नेताहरूको ध्यान पार्टीलाई मजबुत बनाउनेतर्फ केन्द्रित हुन नसकेको पनि बताए । ‘जिम्मेवारी लिइसकेपछि पनि सबैले पार्टीलाई बलियो बनाउन जुन किसिमले सहकार्य गरेर प्रभावकारी बनाउनुपर्ने हो, त्यतातिर हाम्रो ध्यानकेन्द्रित हुन सकेको छैन,’ उनले भने ।