काठमाडौँ — श्रम, रोजगार तथा सामाजिक सुरक्षा मन्त्री शरतसिंह भण्डारीले श्रमिकलाई डिजिटल, ऋणको भार, अनाहक मृत्युको पासोबाट बाहिर निकाल्न सकार कटिबद्ध भएको बताएका छन् ।

१३६ औं अन्तर्राष्ट्रिय श्रमिक दिवसको अवसरमा बिहीबार शुभकामना सन्देश जारी गर्दै श्रम मन्त्री भण्डारीले सबै श्रमजीवी तथा रोजगारदाता एकजुट भई श्रमिक अधिकारको संरक्षण, सामाजिक न्याय र समावेशी समृद्धिको दिशामा अघि बढ्न समेत आव्हान गरेका छन् ।

‘आन्तरिक तथा वैदेशिक रोजगारमा रहेका श्रमिकको हक र अधिकारको सुनिश्चिताका लागि नेपाल सरकार कटिबद्ध छ । समृद्ध नेपाल सुखी नेपालीको लक्ष्य प्राप्तिका लागि श्रमिकहरुको हक र अधिकारको सुनिश्चितता गर्दै नयाँ र परिष्कृत तवरले जुट्नुपर्ने सामूहिक अभिभारा हाम्रो सामु रहेको छ,’ उनले भने,‘आगामी दश वर्षभित्र वैदेशिक रोजगारीमा जानुपर्ने बाध्यकारी अवस्थालाई अन्त्य गर्ने उद्देश्यसहित घोषणा भएको आन्तरिक रोजगार प्रवर्द्धन दशकको कार्ययोजना अन्तिम चरणमा पुगेको छ । यसै क्रममा श्रम ऐन, वैदेशिक रोजगार ऐन लगायत श्रमसँग सम्बन्धित कानुन तथा नीतिहरु सुधारको कार्य अघि बढिसकेको छ ।’