काठमाडौँ — एकीकृत समाजवादीका सांसद प्रेम आलेले नेपाल नागरिक उड्डयन प्राधिकरणका महानिर्देशक प्रदीप अधिकारीलाई पार्टीको दबाबमा नियुक्त गर्नुपरेको बताएका छन् । 

प्रतिनिधिसभाको सोमबारको बैठकमा नेपाल नागरिक उड्डयन प्राधिकरण विधेयक, २०८१ माथिको सैद्धान्तिक छलफलका क्रममा सांसद आलेले उक्त कुरा बताएका हुन् । पार्टीको दबाबमा आफू संस्कृति, पर्यटन तथा नागरिक उड्डयनमन्त्री रहेका बेला जुनियर पदमा रहेका अधिकारीलाई महानिर्देशक बनाउनुपरेको उनको भनाइ थियो।

'माननीय अमरेशकुमार सिंहले पनि भन्नुभयो, जुनियर मान्छेलाई ल्याएर डीजी बनाइयो, हो बनाइयो । मेरै पालामा बनेको हो । तर निधारमा लेखेको हुँदैन नि यो चोर हो कि साधु हो भनेर थाहा त हुँदैन, त्यो बेलामा मैले धेरै पटक भनेको हो, जुनियर मान्छेलाई नबनाऊ भन्दा पनि पार्टीको दबाब झेल्न नसकेर त्यो मुन्छेलाई डीजी बनाइयो ।'