परासी — पूर्वी नवलपरासीको गैंडाकोट नगरपालिका–१२ हर्कपुरमा सोमबार राति तीन वटा सवारी एक आपसमा ठक्कर खाँदा ३ जना घाइते भएका छन् ।
पूर्व-पश्चिम राजमार्गमा गैंडाकोटबाट कावासोतीतर्फ जाँदै गरेको ना ५ ख ७४३९ नम्बरको लहरीले विपरीत दिशाबाट आउँदै गरेको बा.प्र.०१-०२८ च ९०२१ नम्बरको पिकअप र बा १३ च ४५५० नम्बरको भ्यानलाई ठक्कर दिँदा दुर्घटना भएको हो ।
प्रहरीका अनुसार घाइते हुनेहरुमा पिकअप चालक विशाल गुरुङ, सहचालक कमल सिग्देल र भ्यान चालक सन्तोष थापा मगर रहेका छन् ।
घाइतेको नगर अस्पाताल भेँडाबारीमा उपचार भइरहेको छ । दुर्घटनाको कारण नखुलेको र घटनामा संलग्न सवारी र मानिस प्रहरी नियन्त्रणमा रहेको प्रहरीले जनाएको छ ।
