काठमाडौँ — राष्ट्रिय जनमोर्चाका अध्यक्ष चित्रबहादुर केसीले राज्यसत्तामा रहेकाहरूको कमजोरीकै कारण लोकतान्त्रिक व्यवस्था खतरामा परेको बताएका छन् ।

प्रतिनिधिसभाको शुक्रबारको बैठकमा बोल्दै अध्यक्ष केसीले यस्तो बताएका हुन् । उनले सत्तामा गएकाहरूले अप्ठ्यारो परेका बेला सम्झौता गर्ने तर कार्यान्वयन नगर्ने प्रवृत्तिका कारण व्यवस्थामाथि खतरा बढेको बताए। उनले लोकतन्त्र र गणतन्त्रमाथि भइरहेको व्यापक हमलाको समाधान सबै दलहरू मिलेर गर्नुपर्ने उल्लेख गरे। सत्तामा बसेकाहरू नै भ्रष्टाचारमा लिप्त र व्यवस्था विरोधी काम गरिरहे जनतालाई सम्झाउन नसकिने उनको भनाइ छ।

उनले भने, ‘सत्ता र शक्तिमा गएकाले जब अप्ठ्यारो पर्छ सम्झौता गर्छन्, तर सम्झौताहरू कार्यान्वयन गर्दैनन्। ०४६ सालको कुरा लिनुस्, २०६२/०६३ सालको कुरा लिनुस्। अहिले पनि हजारौँ शिक्षकहरू सडकमा छन्। चारैतिरबाट लोकतन्त्र र गणतन्त्रमाथि व्यापक हमला भइरहेको छ, त्यसको समाधान हामी सबै मिलेर गर्नुपर्छ। यदि हामी आफैँले भ्रष्टाचार गरेका छौँ, लोकतन्त्र र गणतन्त्र विरोधी आचरण गरिरहेकै छौँ भने जनतालाई तिमीहरूले कसरी सम्झाउने? आफ्ना नजिकका व्यक्तिले भ्रष्टाचार गरे पनि कारबाही हुँदैन, तर बाहिरकालाई कारबाही हुने- यो त जनताले देखेकै छन् नि।’