काठमाडौँ — निजामती सेवामा प्रवेश गर्ने अधिकतम उमेरसीमा महिलाका लागि घटाइएको छ । राज्यव्यवस्था तथा सुशासन समितिमा प्रस्तुत संघीय निजामती सेवाको गठन, सञ्चालन र सेवाको सर्त सम्बन्धमा व्यवस्था गर्न बनेको विधेयक सम्बन्धमा दिलेन्द्रप्रसाद बडू नेतृत्वको ११ सदस्यीय उपसमितिले तयार पारेको प्रतिवेदनमा महिलाको सेवा प्रवेश गर्न पाउने अधिकतम उमेरसीमा घटाइएको हो ।
समितिबाट पारित हुने चरणमा रहेको विधेयकमा महिलाले ३९ वर्षसम्म मात्रै सेवा प्रवेश गर्न पाउने व्यवस्था प्रस्ताव गरिएको छ । हाल ४० वर्षसम्म महिलाले सेवा प्रवेश गर्न पाउने व्यवस्था छ । अवकाशको उमेर २ वर्ष बढाएर ५८ बाट ६० बनाउँदा पनि महिलाको सेवा प्रवेश उमेरसीमा भने एक वर्ष घटाएर ३९ बनाइएको हो ।
पुरुषको सेवा प्रवेशको उमेरसीमा भने हाल कायम रहेको ३५ वर्ष नै हुने व्यवस्था प्रस्ताव गरिएको छ ।
संघीय निजामती सेवाको गठन, सञ्चालन र सेवाको सर्त सम्बन्धमा व्यवस्था गर्न बनेको विधेयकको दफा १८ मा सरकारले महिलाको उमेरसीमा ३७ वर्ष र पुरुषको ३२ वर्ष हुने व्यवस्था प्रस्ताव गरेको थियो । उक्त उमेरसीमालाई उपसमितिले संशोधन गरेर पुरुषको यथावत ३५ वर्ष राख्ने र महिलाको भने १ वर्ष घटाएर ३९ वर्ष हुने प्रस्ताव गरिएको छ ।
कर्मचारी ट्रेड युनियनहरूले भने सेवा प्रवेशको उमेर पुरुषलाई ३५ वर्ष र महिलालाई ४० वर्ष नै कायम गर्नुपर्ने माग गरेका छन् । अवकाशको उमेर २ वर्ष बढाउँदा महिलाको सेवा प्रवेश उमेर १ वर्ष घटाउनु तर्कसंगत नभएको सांसदहरूको पनि भनाइ छ ।
