सिरहा — चार महिनाअघि यौन दुर्व्यवहारमा परेकी सिरहाकी दलित विवाहित महिला मंगलबार आफ्नै घरमा मृत फेला परेकी छन् । सिरहाको नवराजपुर गाउँपालिका–३ स्थित जगतपुर दोनवारी टोलकी मुसहर समुदायकी २४ वर्षीया आनन्दीदेवी सदाय दिउँसो झुन्डिएको अवस्थामा भेटिएकी हुन् । 

दुई वर्षीया छोरीकी आमा आनन्दी करिब ४ महिनाअघि गाउँकै दुई युवकबाट यौन दुर्व्यवहारमा परेकी थिइन् । यौन दुर्व्यवहार भएको लामो समयसम्म प्रहरीले उजुरी लिन मानेको थिएन भने उजुरीपछि केही व्यक्तिले मिलापत्र गर्न दबाब दिँदै आएका थिए । श्रीमान् वैदेशिक रोजगारीमा भएकाले उनी छोरीसहित माइतीमै बस्दै आएकी थिइन् ।

आनन्दी गत पुस ९ मा बरियारपट्टी गाउँपालिका–१ स्थित नर्गी बस्ने आफ्नी दिदीलाई भेट्न हिँडेकी थिइन् । गाउँमै रहेको पोखरी हुँदै हिँडिरहेका बेला स्थानीय २२ वर्षीय सञ्जीवकुमार यादव र ३२ वर्षीय श्यामसुन्दर यादवले उनलाई घेरा हालेका थिए । पीडित परिवारका अनुसार आनन्दीलाई उनीहरूले शारीरिक सम्पर्क राख्न प्रस्ताव गरेका थिए । तर, नमान्दा जबर्जस्ती दुवै हात समातेर छेउकै आँप बगैंचामा लगेका थिए । 

ती दुईले बगैंचामै रहेको परालको थुप्रोमा लडाएर कपडा च्यात्दै जबर्जस्ती करणी गर्न खोजेका थिए । आनन्दी प्रतिकार गरी उम्केर रुँदै घर आइपुगेकी आमा बिल्टौनदेवी सदायले बताइन् । घटनाकै दिन अपराह्न छोरीलाई सँगै लिएर आमा बिल्टौन इलाका प्रहरी कार्यालय महेशपुर पतारमा जाहेरी दिन गएकी थिइन् । तर प्रहरीले उजुरी लिन मानेको थिएन । पीडित पक्षले ‘मिडियामा जाने’ भनेकाले घटनाको साढे दुई महिनापछि फागुन २५ मा मात्र प्रहरीले पीडकविरुद्ध जबर्जस्ती करणी उद्योगमा जाहेरी दर्ता गरेको थियो । 

पीडकका पक्षबाट केही स्थानीयले घटना गाउँमै मिलाउने प्रयास गरेका थिए । आमा बिल्टौनका अनुसार गाउँकै नरेन्द्र यादवलगायतका केही व्यक्तिले रकम लिएर गाउँमै मिल्न र नमिले उल्टै मुद्दा लगाइदिने धम्की दिएका थिए । ‘उनीहरूले केही पैसा लिएर मिलिहाल भनेर हामीलाई धम्क्याउँथे,’ उनले भनिन्, ‘हामीले नमान्दा उल्टै मुद्दा लगाउँछु भन्ने गरेका थिए ।’

फागुन २६ मा आरोपितविरुद्ध सिरहा जिल्ला अदालतबाट पक्राउ पुर्जी जारी भएको छ । तर पीडकहरू पक्राउ परेका छैनन् । आरोपितको घरमा प्रहरी पुग्दा उनीहरू फेला नपरेको महेशपुर पतार प्रहरीका प्रमुख प्रहरी निरीक्षक रविनराज मैनालीको दाबी छ । आरोपित पक्षबाट आफूहरूलाई फसाइएको भन्ने कुरा आएपछि जाहेरी दर्ता गर्न समय लागेको तर्क मैनालीले गरे । ‘हामीकहाँ जाहेरी आएपछि आरोपितले फसाइएको कुरा गरे,’ मैनाली भन्छन्, ‘त्यसपछि अनुसन्धान गर्दा मुद्दा दर्ता गर्न समय लागेको हो ।’

मृतककी आमा बिल्टौनका अनुसार पीडकहरू गाउँमै बस्ने गरे पनि प्रहरीले पक्राउ गर्न आनाकानी गर्दै आएको हो । ‘हामी न्याय माग्न प्रहरीकहाँ गयौं तर प्रहरीले हामीलाई गन्दै गनेन,’ उनी भन्छिन्, ‘दोषीलाई पक्राउ गर्नुभन्दा पनि हामीलाई नै उल्टासिधा कुरा गरेर आलटाल गरिन्थ्यो । दोषीलाई कारबाही नहुँदा हामी समाजमा अत्याचार सहेर र बेइज्जत भएर बस्नुपर्ने स्थिति भयो ।’