काठमाडौँ — सत्तारुढ कांग्रेसका महामन्त्री गगनकुमार थापाले प्रधानमन्त्री केपी शर्मा ओली नेतृत्वको सरकारले अपेक्षाअनुसार काम गर्न नसकेको बताएका छन् ।

सत्तारुढ दलको नेता हुनुका नाताले सरकारलाई सहयोग गरेको तर सरकारमा रहेकाहरूका कारण नै काम हुन नसकेको थापाको भनाइ छ ।

काठमाडौंमा बिहीबार आयोजित कार्यक्रममा थापाले प्रधानमन्त्री र मन्त्रीले आ-आफ्नो काम गर्नुपर्नेमा त्यसो हुन नसकेको पनि बताएका छन् । सत्तारुढ दलका राजनीतिक संयन्त्रले भनेको कुरा सरकारले नटेर्ने गरेको उनले सुनाए ।

‘जुन गतिमा सरकारले काम गर्नुपर्छ भन्ने हाम्रो अपेक्षा हो, त्यो गतिमा काम हुन सकिरहेको छैन । म पनि संयन्त्रको जिम्मेवारीमा छु, कहिलेकाहीँ साथीहरूलाई लाग्छ- संयन्त्रले सबै कुरा गर्छ । यसबारे कम्तीमा मेरो क्षेत्रका साथीहरू क्लियर हुनुपर्छ । सरकारले गर्ने काम सरकारले गर्नुपर्छ, संयन्त्रले होइन । नियुक्ति, सरुवा बढुवाको काम पनि राजनीतिक संयन्त्रले गर्नुपर्छ भनेर ठान्यौं भने त यो लोकतान्त्रिक सरकार नै भएन नि !' थापाले भने, 'प्रधानमन्त्रीको काम प्रधानमन्त्री र मन्त्रीको काम मन्त्रीले गर्ने हो । संयन्त्रको काम सरकारले लिने र नीतिगत सुधारको विषयमा बल पुर्‍याउने हो । केपी ओली नेतृत्वको सरकारले राम्रो काम गरोस् भनेर हामीले सहयोग गरिरहेका छौं । तर बिँड मात्र तातेर केही नहुँदो रहेछ, ताप्के पनि तात्नुपर्ने रहेछ ।'