रौतहट — नेकपा (एकीकृत समाजवादी) अध्यक्ष एवं पूर्वप्रधानमन्त्री माधवकुमार नेपालले देशमा अब राजा महाराजा नचाहिने बताएका छन् । बिहीबार पार्टीको रौतहट जिल्ला कमिटीको अधिवेशन उद्घाटनका अवसरमा अध्यक्ष नेपालले लोकतान्त्रिक गणतन्त्रमा राजाको कुनै जरुरी नभएको बताएका हुन् ।
‘लोकतान्त्रिक गणतन्त्रमा राजाको कुरा गर्नु उचित हुँदैन’ उनले भने,‘अब पनि राजा महाराजाको कुरा गर्नु राम्रो होइन । हामीलाई चाहिएको पनि छैन ।’
लोकतान्त्रमा जनताले ढुक्कसँगले आफ्नो कुरा राख्न पाउने उनको भनाइ छ । निरंकुश शासन जनताका लागि घाँडो हुने उनले अधिवेशनमा सहभागीलाई सुनाए । जिल्लाको समग्र विकासमा आफूले गरेको योगदानबारे उनले बखान गरे । सडक विस्तारदेखि कालोपत्रसम्मको काम गरेको भनेर अध्यक्ष नेपालले आफ्नो तारिफ गरे ।
चैत १५ गतको राजावादीको कार्यक्रम देशकै लागि राम्रो नभएको उनले सुनाए । सरकारले जनताको हितमा काम गर्नुपर्नेमा अहिलेसम्म सरकारको अनभूति जनताले गर्न नसकेको भन्दै उनले आलोचना गरे ।
