काठमाडौँ — सत्तारूढ र प्रमुख प्रतिपक्ष दलको बैठक सिंहदरबारस्थित प्रधानमन्त्री कार्यालयमा सुरु भएको छ । शान्ति प्रक्रियाका बाँकी काम टुंगोमा पुर्याउन कांग्रेस, एमाले, माओवादीबीच बैठक सुरु भएको हो । बैठकमा प्रधानमन्त्री एवं एमाले अध्यक्ष केपी शर्मा ओली, कांग्रेस सभापति शेरबहादुर देउवा र प्रमुख प्रतिपक्ष दल माओवादी अध्यक्ष पुष्पकमल दाहाल सहभागी छन् ।
बैठकमा गृहमन्त्री रमेश लेखक, प्रधानमन्त्री ओलीका मानव अधिकार तथा संक्रमणकालीन न्यायसम्बन्धी सल्लाहकार अग्नि खरेल, माओवादी उपमहासचिव शक्ति बस्नेत र विज्ञ खिमलाल देवकोटा सहभागी छन् । सत्य निरूपण तथा मेलमिलाप आयोग र बेपत्ता नागरिक छानबिन आयोगमा पदाधिकारी नियुक्ति गर्ने मुख्य तयारी छ । दुवै आयोगसम्बन्धी कानुन बने पनि पदाधिकारी नियुक्ति नहुँदा काम अघि बढ्न सकेको छैन । आयोग पदाधिकारी नियुक्तिमा तीन दलबीच भागबन्डा तयारी छ ।
त्यस्तै, तीन दलबीच राजावादीको प्रदर्शनले मुलुकमा ल्याएको तरंगबारे अनौपचारिक छलफल हुनेछ । संविधान, लोकतन्त्रको पक्षमा तीन दलबीच न्युनतम साझा धाराणा बनाउने उनीहरूको छलफलको विषय छ ।
एक नेताका अनुसार सरकारले दैनिक सेवा दिन गति बढाउने, ठूला विवाद आउने निर्णय नगर्ने, राष्ट्रिय मुद्दामा प्रतिपक्ष दलसँग सहकार्य गर्ने नीति प्रधानमन्त्री केपी शर्मा ओलीले लिएका छन् । प्रमुख प्रतिपक्ष दल माओवादी अध्यक्ष दाहालले सरकारलाई राम्रो काम गर्न दबाब दिने, संघीय गणतन्त्रको पक्षमा प्रदर्शन गर्ने, आवश्यक परे प्रमुख दलबीच साझा धारणा बनाउने नीति लिएका छन् ।
