काठमाडौँ — सहकारी संचालकलाई जेल, हिरासत, थुना र पूर्पक्षमा राखेर बचतकर्ताको रकम फिर्ता गर्न कठिन हुने एमाले सांसद सूर्य थापाले बताएका छन् । प्रतिनिधिसभाको सोमबारको बैठकमा सांसद थापाले विभिन्न शर्त राखेर सञ्चालकहरूलाई सहकारी चलाउने वातावरण बनाउनुपर्ने प्रस्ताव राखेका हुन् । 

सहकारी सम्बन्धी केही नेपाल ऐनलाई संशोधन गर्न बनेको विधेयकमाथिको छलफलमा भाग लिँदै थापाले सहकारी सञ्चालकलाई ऋण असुली गर्ने र बचत फिर्ता गराउनका लागि थुनामुक्त गराउनुपर्ने धारणा राखेका हुन् । ‘अहिले मुद्दा मामलामा जेलमा, थुनामा, पूर्वपक्षमा रहेका व्यक्तिहरूलाई यही स्थितिमा राखेर बचतकर्ताको बचत फिर्ता हुन्न,' थापाले भने ।

सहकारी ठगीको छानबिन गर्न गठित प्रतिनिधिसभाको संसदीय समितिका संयोजकसमेत रहेका थापाले राम्रो प्राणाली बनाउन खोज्दाखोज्दै संसदीय समितिले गरेको सिफारिसलाई जायज रुपमा आत्मसाथ नगरिएको हो कि भन्ने अनुभूति भएको बताए ।