काठमाडौँ — समाजवादी मोर्चाको शुक्रबार बसेको बैठकले गणतन्त्रात्मक व्यवस्थाको पक्षमा अन्तर्क्रिया र सभा गर्ने निर्णय गरेको छ । राजावादीहरूले गणतन्त्रात्मक व्यवस्थामाथि प्रश्न उठाइरहेका बेला त्यसको प्रतिवादस्वरूप अन्तर्क्रिया र प्रदर्शन गर्न लागेको मोर्चाले जनाएको हो।

मोर्चाले शनिबार बुद्धिजीवी र नागरिक समाजसँग अन्तर्क्रिया गर्ने भएको छ । अन्तर्क्रियामा नागरिक समाजका अगुवा, लोकतान्त्रिक गणतन्त्रमा योगदान दिएका वरिष्ठ व्यक्ति सहभागी हुने मोर्चाले जनाएको छ । मोर्चाका संयोजक एवं नेपाल कम्युनिस्ट पार्टीका महासचिव नेत्रविक्रम चन्दले मुलुकलाई पश्चगमनतिर ढल्काउने प्रयास भइरहेकाले अग्रगमनको पक्षमा अन्तर्क्रिया र प्रदर्शन गर्ने निर्णय गरेको बताए ।

‘देशमा अहिले अस्थिर राजनीतिक अवस्था छ । यसबारे मोर्चाको तर्फबाट दृष्टिकोण राख्नेछौं । आन्दोलन किन गर्नुपर्‍यो भनेर हाम्रो दृष्टिकोण स्पष्ट गर्ने हो,’ उनले भने, ‘देशलाई पश्चगमनतिर लैजाने जुन खेल भइरहेको छ, यसका विरुद्ध बोल्नुपर्ने बेला आएको छ ।’ उनले यो राजनीतिक प्रणालीले जनतालाई सन्तुष्टि दिन नसकेकोबारे छलफल गर्ने पनि बताए । ‘अग्रगमनका लागि नेपाली विशेषताको समाजवादबारे धारणा राख्नेछौं,’ उनले भने ।

मोर्चाले कांग्रेस र एमालेको गठबन्धन सरकारले सर्वसाधारणसँग जोडिएका विषय सम्बोधन गर्न नसक्दा असन्तुष्टि बढ्दै गएको निष्कर्ष पनि निकालेको छ । नेपाल समाजवादी पार्टीका नेता गंगानारायण श्रेष्ठले गणतन्त्र अभिसाप जस्तो गरी भ्रम सिर्जना गरिएकाले त्यसलाई चिर्न कार्ययोजना बनाएको बताए । 

एसद्वारा आन्दोलन घोषणा एकीकृत समाजवादीले जनसरोकारका सवाल उठाउँदै आन्दोलन घोषणा गरेको छ । उक्त पार्टीले चैत २० मा सरकारलाई ज्ञापनपत्र बुझाउने भएको छ । चैत मसान्तसम्म प्रदेश र जिल्ला तहमा सार्वजनिक  संवाद तथा सुझाव संकलन, वैशाख ५ मा प्रदेश सरकार र जिल्ला प्रशासन कार्यालयमा  ज्ञापनपत्र पेस गर्ने, वैशाख १५ सम्म पालिका र वडा तहमा सार्वजनिक संवाद तथा  सुझाव संकलन, वैशाख १९ देखि २२ सम्म पालिका र वडा कार्यालयमा ज्ञापनपत्र पेस  गर्ने, वैशाख २५ मा दोस्रो चरणको कार्यक्रम सार्वजनिक गर्ने निर्णय गरेको पार्टीका महासचिव घनश्याम भुसालले बताए ।

‘मुलुक राजनीतिक अग्रगमनतिर जान्छ, पश्चगमनतिर होइन’  : नेत्रविक्रम चन्द

समाजवादी मोर्चा संयोजक एवं नेकपा महासचिव

समाजवादी मोर्चाले केके निर्णय गर्‍यो ?

मुख्यगरी तीन वटा विषयमा निर्णय गरेको छ । शनिबार मोर्चाले बुद्धिजीवीसँग आफ्नो धारणा स्पष्ट गर्न अन्तर्क्रिया गर्ने कुरा भएको छ । नेपालको राज्य प्रणालीबारे सुझाव सल्लाह लिइनेछ । त्यसपछि पत्रकारहरूसँग भेटघाट गर्ने र चैत १५ मा जनसभामा गर्ने निर्णय भएको छ ।

यति नै बेला जनसभा गर्नुको मुख्य उद्देश्य के हो ?

देशमा अहिले अस्थिर राजनीतिक अवस्था छ । यसबारे मोर्चाका तर्फबाट आफ्नो दृष्टिकोण राख्न सभा आयोजना गर्न लागेका हौं ।

राजावादीले गरेको प्रदर्शनको काउन्टर सभा गर्न लाग्नुभएको हो ?

मुख्य गरी दुई विषय छन् । आन्दोलन किन गर्नुपर्‍यो भनेर हाम्रो दृष्टिकोण स्पष्ट गर्ने हो । देशलाई पश्चगमनतिर लैजाने जो खेल भइरहेको छ, यसका विरुद्ध बोल्नुपर्ने बेला आएको छ । हामीले जनतालाई भन्नुपर्नेछ, अग्रगमन किन आवश्यक छ ? साथै अहिले भइरहेको राजनीतिक प्रणालीले जनतालाई सन्तुष्टि दिन सकेको छैन । सक्दैन । यसको निकासका लागि नेपाली विशेषताको समाजवादको बारेमा आफ्नो धारणा राख्नेछौं ।

मुलुकलाई पुनः राजतन्त्रतिर फर्काउने प्रयास सम्भव देख्नुहुन्छ ?

त्यो सम्भव छैन । यद्यपि हरेक वर्ग, प्रवृत्तिलाई आफ्नो कुरा राख्ने अधिकार छ । अहिलेको अवस्थाबाट पछाडि फर्काउने सम्भावना हामी देख्दैनौं । मुलुक अग्रगमनतिर जानुपर्छ, पश्चगमनतिर होइन । मुलुकलाई अग्रगमनतिर लैजाने हाम्रो उद्देश्य हो ।

व्यवस्थाविरुद्ध किन चलखेल भइरहेको छ ?

राज्यमा स्थिरताको अभाव भयो । राज्यले स्पष्ट मार्गचित्र दिन सकेन । त्यसको अलमल अकर्मण्यताको अभिव्यक्ति पनि हो । जनता सन्तुष्ट छैनन् । मुलुकमा राजनीतिक अस्थिरता, आर्थिक संकट, सांस्कृतिक समस्या, विदेशीको चलखेलबाट आम जनता नै असन्तुष्ट छन् । म गतसाता जुम्ला, कालीकोट पुग्दा, त्यहाँका जनता पनि अहिले चलिरहेको अवस्थाप्रति सन्तुष्ट छैनन् । त्यसको अभिव्यक्ति बाहिर आएको हो ।