सोलुखुम्बु — हिमाल आरोहणको मुख्य सिजन वसन्त ऋतु सुरु भएसँगै सगरमाथा चढ्ने बाटो बनाउन ‘आइसफल डाक्टर’को टोली आधार शिविरतर्फ प्रस्थान गरेको छ । बाटो बनाउने जिम्मा पाएको सगरमाथा प्रदूषण नियन्त्रण समिति (एसपीसीसी)ले खुम्बु आइसफल मार्ग निर्माण तथा मर्मत गर्न टोली सगरमाथा आधार शिविर पठाएको हो ।

हिमाल आरोहणको उपयुक्त मौसम वसन्त ऋतुका लागि अनुभवी बाटो बनाउने टोली नाम्चे बजारबाट बन्दोबस्तीका सामानसहित आधारशिविर पठाइएको एसपीसीसी अध्यक्ष लामाकाजी शेर्पाले बताए ।टोलीमा आधारशिविर व्यवस्थापक छिरिङ तेन्जिङ शेर्पासहित ८ जना ‘आइसफल डाक्टर’ समावेश छन् ।

दुई वटा टोलीको आङसर्की शेर्पा र दावाजाङ्बु शेर्पाले नेतृत्व गरेका छन् । टोलीमा दाबा नुरु शेर्पा, निम तेन्जी शेर्पा, मिङ्मा ग्याल्जेन शेर्पा, दाबा छिरी शेर्पा, लाक्पा सोना शेर्पा र तेन्डु शेर्पा छन् । सन् १९९७ देखि संस्कृति, पर्यटन तथा नागरिक उड्डयन मन्त्रालयअन्तर्गतको पर्यटन विभागले समितिलाई खुम्बु आइसफलको आरोहण मार्ग निर्माण तथा मर्मतको जिम्मेवारी दिँदै आएको छ ।

उक्त टोलीले बौद्ध परम्पराअनुसार हिमालको प्रार्थना र पूजा गरेर मात्रै बाटो बनाउने काम सुरु गर्छ । ‘लामालाई साइत हेराएपश्चात बाटो बनाउने काम सुरु हुन्छ,’ अध्यक्ष शेर्पाले भने । हिमालमा बाटो बनाउने कामलाई अत्यन्तै जोखिमपूर्ण मानिन्छ । उनीहरुको टोलीले दोस्रो आधारशिविरसम्म डोरी टाँग्ने र अप्ठ्यारो ठाउँमा भर्‍याङ हाल्ने काम गर्छन् । सोही बाटोमा आरोहीले सहजताका साथ आरोहण गर्ने गर्छन् । सगरमाथाको दोस्रो आधारशिविरसम्म बाटो बनाउन २० दिन लाग्ने एससिसिसिले जनाएको छ ।

सगरमाथा क्षेत्रमा बाटो बनाउने र सरसफाइको काम सगरमाथा प्रदूषण नियन्त्रण समितिले गर्दै आएको छ । उक्त काम गरे बापत समितिले आरोहण दलमा आउने प्रत्येक विदेशी नागरिकसँग ६ सय अमेरिकी डलर लिँदै आएको छ । ‘हामीले बाटो बनाउने र सरसफाई गर्ने सबै काम गर्छौं,’ अध्यक्ष शेर्पाले भने, ‘हामीले पर्यटन मन्त्रालयसँगको सम्झौतामा सबै काम गरेका हौं, हाम्रो आम्दानीको मुख्य स्रोत नै यही शुल्क हो ।’