काठमाडौँ — भन्सारका समस्या कम गर्न बजार अनुगमन र आयकरको मापदण्डलाई दरिलो बनाउन जरुरी भन्सारमा वस्तुको वर्गीकरण वस्तुको प्रकृतिअनुसार गर्नुपर्नेमा सरोकारवालाहरूले जोड दिएका छन्।

प्रतिनिधिसभाअन्तर्गतको अर्थ समितिको शुक्रबारको बैठकमा 'भन्सारसम्बन्धी कानुनलाई संशोधन र एकीकरण गर्न बनेको विधेयक' माथिको दफावार छलफलमा बोल्दै सरोकारवालाहरूले यस्तो बताएका हुन्।

वस्तुको वर्गीकरण सहज देखिए पनि प्राविधिक रूपमा कठिन हुने उनीहरूको धारणा छ। बैठकमा बोल्दै अर्थ मन्त्रालयका सचिवले वर्गीकरणमा फरक परेमा वस्तुको मूल्यमा समेत फरक पर्ने उल्लेख गर्दै वस्तुको प्रकृतिअनुसार वर्गीकरण गरिनुपर्नेमा जोड दिए।

उनले भन्सारका कर्मचारीले वस्तुको वर्गीकरण गर्न नसकेको अवस्थामा विज्ञको समेत सुझाव लिन सकिने बताए । वर्गीकरणमा कुनै दुविधा भएमा वस्तुको नमूना भन्सार विभागका महानिर्देशकलाई पठाउने र विभाग प्रमुखले प्रचलित मान्यताअनुसार वर्गीकरण गरिदिने व्यवस्था गर्न जरुरी रहेको बताए। उनले वस्तुको वर्गीकरण भन्सार संगठनसँग गर्नुपरेको अवस्थामा समय सीमा राख्न उचित नहुने सचिव घिमिरेको भनाइ छ।

उनले भने, 'वस्तुको वर्गीकरण फरक पर्यो भने महसुल पनि फरक पर्छ। त्यसकारणले गर्दा वस्तुको प्रकृतिअनुसार वर्गीकरण गरिनुपर्छ। अन्तर्राष्ट्रिय वस्तुहरू चिनेर वर्गीकरण गर्नको लागि कोडहरूको प्रयोग गरिन्छ। अन्तर्राष्ट्रिय मान्यताअनुसार वस्तुको वर्गीकरण गरिने भए पनि कहिलेकाहीँ समस्या पर्न सक्छ। त्यस्तो दुविधा परेमा भन्सार विभागका महानिर्देशकलाई पठाउने र उहाँले भइरहेको अभ्यासअनुसार वर्गीकरण गरिदिने गनुपर्छ। वस्तुको वर्गीकरण गर्न नसकेको अवस्थामा विज्ञसँग पनि राय लिन सकिन्छ। भन्सार संगठनसँग पनि यस विषयमा राय लिन सकिन्छ। वस्तुको वर्गीकरणको विषय हेर्दा सजिलो देखिए पनि एकदमै प्राविधिक विषय हो।'