काठमाडौँ — माओवादी अध्यक्ष पुष्पकमल दाहालले पार्टीले सुरु गरेको 'जनतासँग माओवादी, तराई मधेश जागरण अभियान'का कारण देशकै ध्यान मधेशमा केन्द्रित भएको बताएका छन् ।
शुक्रबार सर्लाहीको मलंगवामा आयोजित सभालाई सम्बोधन गर्दै दाहालले मधेशका समस्या पहिचान गरेर समाधानका लागि पहल गर्ने उद्देश्यसहित आफ्नो पार्टीले अभियान सुरु गरेपछि अन्य प्रमुख दलका मुख्य नेता र राष्ट्रिय मिडियाको ध्यान मधेशतिर केन्द्रित हुन थालेको बताएका हुन् ।
झापाबाट सुरु भएको अभियान सर्लाही पुग्दासम्म जनतामा ठूलो उत्साह देखिएको उल्लेख गर्दै अध्यक्ष दाहालले यो अभियान कन्चनपुर पुगेर सकिँदासम्म तराई मधेस जुरुक्कै उठ्ने विश्वास व्यक्त गरे ।
समावेशिताको बढी आवश्यकता मधेसी समुदायलाई भएको र यसको नेतृत्वकर्ता शक्ति माओवादी भएकाले अब माओवादी र मधेशी जनतको एकता अपरिहार्य र अनिवार्य भइसकेको अध्यक्ष दाहालले स्पष्ट पारे ।
