नक्कली कागजातका भरमा ११ सय बचतकर्ताको पैसा हिनामिना गर्ने सहकारी अध्यक्ष राजेश शाक्यमाथि कारबाही अघि बढेन
पोखरा — म्याग्दीको बेनीमा रहेको कस्तुरी बहुउद्देश्यीय सहकारी संस्थाको बचत रकम नक्कली कागजातका आधारमा अध्यक्षका परिवारले लगेको पाइएको छ । कस्तुरी सहकारीका अध्यक्ष राजेश शाक्यले धितो नराखी सहकारीमा जम्मा भएको रकमको ९१ प्रतिशत रकम ऋण लिएका हुन् । ऋण लिँदा जग्गा लगेको ऋण खाम्ने धितो समेत राखिएको छैन ।
सहकारीका अध्यक्ष शाक्यको श्रीमती,दाजु ,दुई जना दिदी,भतिजका नाममा ४७ करोड ९९ लाख २९ हजार १ सय ३८ रुपैयाँ ऋण लगिएको छ । यो सहकारीमा जम्मा भएका बचतकर्ताहरूको रकमको ९१ प्रतिशत हो । सहकारीले कूल ५२ करोड ३२ लाख ८२ हजार ऋण लगानी गरेको छ । कूल लगानी गरिएको ५२ करोडमध्ये शाक्यको एउटै परिवारका सदस्यहरूले करिब ४८ करोड ऋण लगेर नतिरेपछि करिब ११ सय बचतकर्ताहरूको बिचल्ली भएको छ ।
एक वर्षअघि २७ जना बचतकर्ताले रकम फिर्ता मागेपछि सहकारीमा भएको अनियमितता बाहिर आएको हो । एक वर्ष बितिसक्दा पनि छानबिन र कारबाही भएको छैन । अध्यक्ष राजेश शाक्यले आफना घरपरिवारका सदस्यहरूको नाममा कर्जा लगे पनि उनि आफैंले त्यो सबै रकम चलाएको देखिने छानबिन समितिको प्रतिवेदनमा औंल्याइएको छ । शाक्य नेकपा एमालेका जिल्ला नेतासमेत हुन् । सहकारीका व्यवस्थापक लोकबहादुर पुन लोकेश बेनीकै कुमारी सहकारीको १ अर्ब ४९ करोड रकम हिनामिनामा संलग्न भएको प्रमाणका आधारमा थुनामा छन् ।
एक वर्षअघि नै बेनी नगरपालिकाका मेयर सुरत केसीको संयोजकत्वमा भएको छानबिनमा सबै रकम हिनामिना भएको तथ्य सार्वजनिक भए पनि रकम असुली र हिनामिना गर्नेमाथि अनुसन्धान र कारबाहीसमेत सुरु भएको छैन । मेयर केसीसमेत एमालेका नेता हुन् ।
मेयरको संयोजक भएको छानबिन समितिमा उपमेयर ज्योति लामिछाने, तत्कालीन सहायक प्रमुख जिल्ला अधिकारी, बेनी नगरपालिकाका तत्कालीन प्रमुख प्रशासकीय अधिकृत नेत्रप्रसाद पौडेल सदस्य थिए । सहायक प्रमुख जिल्ला अधिकारी आफैंसमेत रहेर सहकारीमा अनियमितता भएको ठहर गरेको एक वर्ष बितिसक्दा पनि रकम हिनामिनाका प्रमुख योजनाकार शाक्यमाथि अनुसन्धानसमेत अघि बढाइएको छैन ।
छानबिन समितिका संयोजक मेयर सुरत केसीले गत चैतमा आफूहरूले छानबिन गर्दा सहकारीमा अनियमितता भेटिएको बताए । 'रकम हिनामिना गरेको देखिन्छ,' केसीले भने, 'हिनामिनाको आधारमा अध्यक्षको सम्पत्ति रोक्का गरिएको छ । ऋण लगेअनुसारको धितो राखेको पनि देखिन्न,' उनले भने ।
रकम हिनामिना गर्नेमाथि किन कारबाही नगरिएको हो त भन्ने प्रश्नमा मेयर केसीले भने, 'कारबाही भनेर कसैले उजुरी गरेकै छैन । कसरी कारबाही गर्ने ?,' उनले प्रतिप्रश्न गरे ।
कस्तुरी सहकारीमा भएको आर्थिक अनियमितता बारेमा प्रमुख जिल्ला अधिकारी गुरुदत्त ढकालले आफूलाई जानकारी नभएको टेलिफोनमा बताए । 'कसैले उजुरी गरेको छैन, उनले भने, ,अब कुन ठाउँमा अनियमितता भएको छ भनेर खोज्दै हिँड्ने कुरा भएन ।'
