अर्घाखाँची — नेकपा माओवादी केन्द्रकी उपाध्यक्ष एवं पूर्वमन्त्री पम्फा भुसालले कांग्रेस र एमालेसँग तालमेल गरी चुनाव लड्दा पार्टीलाई घाटा लागेकी बताएकी छन् । 

शनिबार बिहान सन्धिखर्कमा प्रेस सेन्टर नेपालले आयोजना गरेको पत्रकार सम्मलेनमा उपाध्यक्ष भुसालले विगतका ती कमजोरीमा आत्मालोचना गर्दै आगामी चुनाव एक्लै लड्ने बताइन् । 

८४ को निर्वाचनमा माओवादीले २०६४ जस्तै मत ल्याएर देशको पहिलो शक्ति बन्ने उनको दाबी छ । त्यसका लागि माओवादीले अब जनतासँग माओवादी अभियान लिएर तल्लो तहसम्म जान लागेको बताइन् । 

विगतमा माओवादीलाई सहयोग गरेका, सहिद तथा बेपत्ता पारिएकाका परिवारसहित जनतासँग सम्बन्ध बलियो बनाएर माओवादी आगामी चुनावमा पहिलो पार्टी बन्नेगरी होमिएको दाबी गरिन् ।

अब माओवादी सरकार बनाउने र भत्काउने खेलमा नलागेर संगठन निर्माणमा सक्रिय भएको उनको भनाइ छ । ‘विगतमा कांग्रेस/एमालेसँग चुनावी गठबन्धन गरेर गल्ती भयो’, उनले भनिन्, ‘अब त्यो धुलो मैलो टक्टक्याएर जनतासँग जाँदैछौं ।’