काठमाडौँ — सरकारप्रति जनताको आक्रोश बढ्दै गएको प्रमुख प्रतिपक्षी दल माओवादीका अध्यक्ष पुष्पकमल दाहालले बताएका छन् ।

शनिबार काठमाडौंमा आयोजित पार्टीको कार्यकम्रमलाई सम्बोधन गर्दै दाहालले मुलुकको राजनीतिक परिस्थिति चुनौतीपूर्ण बन्दै गइरहेको दाबी पनि गरेका छन् । 

सरकारको उपलब्धि दिनदिनै नराम्रो हुँदै गइरहेको दाहालको भनाइ छ । जनतामा सरकारप्रति आक्रोश र असन्तुष्टि बढ्दै गएको उनको भनाइ थियो । सरकारप्रति जनताको आक्रोश र असन्तुष्टिलाई लिएर पूर्वराजा ज्ञानेन्द्र शाहले पुनरागमन गर्न भन्दै दिवास्वप्न देख्ने गरेको पनि दाहालको भनाइ थियो ।

‘अहिले देशमा राजनीतिक परिस्थिति अलि चुनौतिपूर्ण नै छ । आजै पनि तपाईंले मिडियामा हेर्नुभयो होला, सरकारको पर्फमेन्स दिनप्रतिदिन नराम्रो हुँदै गएको छ, जनतामा दिनप्रतिदिन सरकारप्रति असन्तुष्टि र आक्रोश बढ्दै गएको छ,' दाहालले भने, 'सरकारप्रतिको यो आक्रोशलाई विभिन्न राजनीतिक प्रवृत्तिले आफ्नो-आफ्नो हिसाबले प्रयोग गर्ने कोसिस पनि गरिरहेका छन् । मलाई लाग्छ तपाईंहरू सबैले यो कुरालाई महसुस गरिरहनुभएकै छ । अझ त्यसमा पनि इतिहासमा इतिहासको एउटा रछ्यानमा मिल्क्याइएका तत्त्व पनि फेरि एकचोटि पुनरागमन हुने हो कि भन्ने दिवास्वप्नमा छन् र त्यस खालका प्रचारबाजी पनि भइरहेका छन् ।’