गोरखा — माओवादीका अध्यक्ष तथा पूर्वप्रधानमन्त्री पुष्पकमल दाहालले नेपाल प्रचूर संभावना भएको देश रहेकाले निराशाजनक र हिनताभाव पैदा गर्ने कुराले हित नगर्ने बताएका छन् ।

 बिहीबार पालुङटार नगरपालिका–१० स्थित मिरकोटको कोटगढी महोत्सव उद्घाटन समारोहलाई सम्बोधन गर्दै दाहालले जल, जमिन, जडिबुटी, पर्यटन विकासको दृष्टिकोणले प्रचूर संभावना रहेको  बताए ।

‘देशमा युवाविहीन हुँदै गएको छ, जग्गा बाँझो हुँदै गएको छ, यो कुरा सर्वत्र सुनिन्छ,’ उनले भने,‘निराशाजनक र हिनताभाव पैदा गर्ने किसिमको कुराले देशको हित गर्दैन, नेपालमा धेरै कुरा छ, केही कुरा भएको पनि छ, केही हुँदै छ, युवालाई, आफ्ना छोराछोरीलाई विदेश जान होइन आफ्नै खेतबारी, व्यापार व्यवसाय, साना ठूला कुटिर उद्योगमा केन्द्रित हुन उत्प्रेरित गरौँ, यस्ता विषयमा सुझाव दियो भने केही वर्षभित्रै धेरै सम्पन्न देश हुन सम्भव छ, त्यो आधार हामीसँग छ ।’  

केही भएन भनेर राष्ट्रप्रति जनताको सम्मान कमजोर पार्ने काम नगर्न दाहालले आग्रह गरे । ‘आत्मसम्मान गुम्न नदिऔँ, कमजोर नठानौं, देश बनाउन संभव छ, हामीले नै बनाउने हो,’ उनले भने ।