काठमाडौँ — प्रतिनिधिसभाको बैठकमा फेरि एकपटक प्यालेस्टिनी समूह हमासको नियन्त्रणमा रहेका नेपाली विद्यार्थी विपिन जोशीको रिहाइको विषय उठेको छ । राष्ट्रिय जनमोर्चाका अध्यक्ष चित्रबहादुर केसीले मंगलबार प्रतिनिधिसभाको बैठकमा यो विषय उठाएका हुन् । उनले जोशीको रिहाइका लागि भइरहेको पहलबारे संसद्‍लाई जानकारी गराउन सरकारसँग माग पनि गरेका छन् ।

बाहिर जोशी जीवितै रहेको सुनिने गरे पनि सरकारले औपचारिक जानकारी नदिएको बताउँदै उनले प्रश्न गरे, 'जोशीको रिहाइको लागि सरकारले के प्रयत्न गरिरहेको छ ?'

अध्यक्ष केसीले इजरायल-हमास द्वन्द्वमा पचासौँ हजार मान्छेको मृत्यु भएको र दुईपक्षबीच शान्ति सम्झौता भएपछि कयौं देशका गिरफ्तारीमा परेका नागरिक रिहाइ भएको पृष्ठभूमि बताउँदै कञ्चनपुरका विपिन जोशीको अत्तोपत्तो नभएको बताए । उनले भने, 'यसबारे सरकारले संसद‍्लाई जानकारी गराउनु पर्दैन ?' उनले विपिन जिउँदै  छन् भनेर मात्र सरकारको जिम्मेवारी पूरा नहुने बताउँदै उनको रिहाइमा सरकारले के प्रयत्न र कस्तो संघर्ष गरिरहेको छ भनेर संसद्‍लाई जानकारी दिनुपर्ने पनि बताए ।

२५ माघमा सभामुख देवराज घिमिरेले हमासद्वारा अपहरण गरिएका नेपाली विद्यार्थी विपिन जोशीको शीघ्र रिहाइका लागि अरब संसद्का अध्यक्ष मोहम्मद अहमद अल–यमाहीलाई पत्र लेखेका थिए । जोशीको रिहाइका लागि सरकारले कूटनीतिक पहल गरिरहेको छ । नेपालका लागि इजरायली राजदूत श्मुलिक आरी बासले समेत सभामुखसँगको भेटमा विपिनको रिहाइका लागि संसदीय कूटनीतिसमेत प्रयोग गर्न सकिने सुझाव दिएका थिए । परराष्ट्र मन्त्रालय स्रोतका अनुसार विपिनको रिहाइको विषयलाई भैंसेपाटी (ललितपुर)स्थित कतारी दूतावासदेखि दोहास्थित अमिरी दिवानसम्म पटक–पटक पुर्‍याइएको छ ।