वीरेन्द्रनगर — थातथलो खोज्दै ४० वर्षपछि भारतबाट नेपाल आएका बमबहादुर डाँगीले परिवार भेटेका छन् । गत पुस ११ मा कान्तिपुर दैनिकमा ‘थातथलो खोज्दै ४० वर्षपछि नेपाल’ शीर्षकमा समाचार छापिएपछि उनीबारे आफन्तले जानकारी पाएका थिए । आफन्तसँगको सम्पर्कपछि बमबहादुरले परिवार भेट्टाएका हुन् ।

१३ वर्षको उमेरमा घरबाट हराएका बमबहादुर अपरिचित एक भारतीयको साथ लागेर भारततिर गएका थिए । भारत पुगेपछि अलपत्र परेका उनी घर फर्किन सकेका थिएनन् ।

पछि नेपालमा रहेको परिवारको याद आए पनि उनको आर्थिक अवस्था र पारिवारिक व्यस्तताले खोज्न पाएका थिएनन् । छोराछोरी हुर्केर कमाउने भएपछि परिवार खोज्दै नेपाल आएका थिए । बमबहादुर २ छोरीसहित गत पुसमा सुर्खेत पुगेका थिए । त्यतिबेला एक साता नेपाल बसेर परिवार खोजे पनि नभेटिएपछि भारत फर्किएका थिए । 

परिवार खोजिरहेको समाचार बमबहादुरकी भान्जी धनसरा वलीले थाहा पाएपछि उनलाई आफ्नो मामा हराएको याद आयो । अनि मामाका छोरीहरूसँग फेसबुकमा जोडिएर कुरा गरिन् । भारतमा बस्ने बहिनी गंगा वली सिंहलाई पनि मामाका छोरीहरूको नम्बरमा सम्पर्क गर्न लगाइन् । 

धेरै जना आफन्त जोडिएर बमबहादुरको परिवारसँग कुरा गर्न थाले । अनि बमबहादुर हराएका मामा नै भएको थाहा पाएपछि नेपाल बोलाएको धनसराले बताइन् । मामासँगै माइजू, एउटा बहिनी र भाइ पनि आएको उनले जानकारी दिइन् । 

मामाको परिवार आएपछि यता यहाँ रहेका दुई मामाहरू ठगबहादुर र टेकबहादुरले टीकाटालो गरेर सबै आफन्त बोलाएर खानपिन, नाचगान गर्दै रमाइलो गरेको उनले बताइन् । ‘हाम्रो लागि ठूलो भगवान् समाचारै बन्यो,’ उनले भनिन्, ‘समाचार पढ्दा माइलो मामाको नाम मिल्यो । बाजेको नाम रनबहादुर थियो तर मामाले रामबहादुर भन्नुभएको रहेछ । मामाले समाचारमा भनेका केही नाम मिलेका थिए । केही मिल्न खोजेका थिए । उहाँलाई चोट लागेका कारण सबै कुरा याद रहेनछ ।’

बमबहादुरको परिवार सुर्खेतको भेरीगंगा नगरपालिका–१३ रामघाटमा बस्दै आएको छ । यो पहिलेको रामघाट गाविस–६ थियो । घरबाट झगडा गरेर भागेकी भाउजूलाई फर्काउन गएका बेला बमबहादुर हराएको परिवारले जनाएको छ । बमबहादुरले वीरेन्द्रनगरबाट हराएको भने पनि भाइ छिन्चु बजारबाट हराएको उनका दाइ ठगबहादुरले बताए । भाइ बिरामी भएकोले धेरै कुरा बिर्सिएको उनले बताए । ‘भाइ भेटिएकोमा धेरै खुसी लागेको छ । भाइलाई यतै घरमा हामीले जमिन पनि भाग लगाएर राखेका छौं,’ उनले भने, ‘भाइलाई हामीले सबै परिवार लिएर यतै बस पनि भनेको छु । अब उसले के गर्छ । जता बसे पनि भेट भयो यही ठूलो कुरा भयो ।’ 

बमबहादुरका बुवाआमाको भने धेरै वर्षअघि मृत्यु भइसकेको छ । उनका दुई जना दाइ र एक भाइ छन् । भाइ भारतमै बस्ने गरेका छन् । उनका चार दिदीमध्ये एक जनाको मृत्यु भइसकेको छ । अन्य दिदीसँग पनि बमबहादुरले भेटेका छन् । भारतको हिमाचलको सिम्लामा बसोबास गर्दै आएका उनीसँग भारतीय रासन कार्डबाहेक कुनै आधिकारिक कागजात छैन । परिवार भेटेपछि बमबहादुर आफ्नो र परिवारको नागरिकता बनाउने तयारी गरिरहेका छन् ।