काठमाडौँ — आफ्नो कार्यकक्षमा भएको आगलागीबाट मन्त्रालयका कुनै पनि महत्त्वपूर्ण कागजातमा क्षति नपुगेको खानेपानीमन्त्री प्रदीप यादवले दाबी गरेका छन् । मन्त्री यादवको कार्यकक्षमा शनिबार बिहान आगलागी भएको थियो । 

आगलागीपश्चात मन्त्रालय पुगेका मन्त्री यादवले आगलागीबाट मन्त्रालयका अति आवश्यक एवम् महत्वपूर्ण कागजातमा कुनै क्षति नभएको बताएका हुन् । मन्त्री यादवसँगैसचिव प्रमिलादेवी शाक्य बज्रचार्य, सहसचिव रमाकान्त दुवाडीसहितको टोली मन्त्रालय पुगेको थियो । 

आगलागी भएको मन्त्रालयको निरीक्षण पश्चात मन्त्री यादवले भने, 'मैले मन्त्रालयका आवश्यक कागजात आफ्नो टेबलमा राख्दिनँ, सबै सही गरेर सचिवलाई पठाउने गर्छु । सामान्य केही पढ्नका लागि राखिएका कागजात बाहेक कुनै पनि महत्वपूर्ण कागजात नष्ट भएको छैन ।'

विद्युत् सर्ट भएकै कारण आगलागी भएको हुनसक्ने आशंका मन्त्री यादवले गरेका छन् । उनले भने, 'दु:खद् घटना भयो । घटनाबारे प्रहरीले अनुसन्धान गरिरहेको छ । हिजो शुक्रबार नै विद्युतको तार पोलिएको गन्ध आएको थियो । मैले कार्यालय सहयोगीलाई यसको जानकारी गराएको थिएँ । पानी तताउने मेसिन होला भनेर विद्युतका सबै प्लगहरू निकाल्न लगाएको थिएँ, आज भने आगलागी भयो ।'