काठमाडौँ — अमेरिकाबाट फर्काइएका ११६ आप्रवासी भारत आइपुगे, थुनछेक बहसपछि रवि लामिछाने प्रहरीको जिम्मामा, नागरिकता र लालपुर्जा नभए पनि सुस्तामा विद्युत् मिटर जडान हुनेदेखि गाजा कब्जा गर्ने बताएपछि ट्रम्पको चौतर्फी विरोधसम्मका खबर आज चर्चामा रहे । 

000

अमेरिकामा अवैध रूपमा रहेका भारतीय आप्रवासी बोकेको जहाज विमान अवतरण गरेको छ । अमेरिकी सेनाको उक्त जहाज पञ्जाब प्रान्तको अमृतसरस्थित श्री गुरू रामदास जी अन्तराष्ट्रिय विमास्थलमा अवतरण गरेको हो । अमेरिकी सेनाको विमानबाट १ सय १६ आप्रवासी भारत आइपुगेका स्थानीय सञ्चार माध्यमहरूले जनाएका छन् । तीमध्ये २५ महिला र १२ बालबालिका रहेका जनाइएको छ । विमानमा ११ चालक दलका सदस्य र ४५ जना अमेरिकी अधिकारीहरू रहेका छन् ।

000

रवि लामिछानेलाई बुधबारको बहसपछि प्रहरीको जिम्मा लगाइएको छ । आज बहस नसकिएको हुँदा भोलि बिहान १० बजे उपस्थित गराउने गरी सुरक्षाकर्मीको जिम्मा लगाइ जिल्ला प्रहरी कार्यालय चितवन पठाएको चितवन जिल्ला अदालतका सूचना अधिकारी अमृत विश्वकर्माले बताए । 

000

पश्चिम नवलपरासीको सुस्ताका स्थानीयले नागरिकता र लालपुर्जा नभए पनि विद्युत् जडान गर्न पाउने भएका छन् । सुस्ता गाउँपालिका वडा नम्बर-५ सुस्ता बस्तीमा १ हजार ५ सय ७१ मिटर लामो झोलुङ्गे पुलबाट राष्ट्रिय प्रशारण लाइन पुगे पनि लालपुर्जा र नागरिकता नहुँदा अधिकांश सुस्ताबासीले विद्युत् मिटर जडान गर्न पाएका छैनन् ।