काठमाडौँ — सांसदलाई मन्त्रीहरूको आलोचना गर्नबाट रोक्न नहुने कांग्रेसका सांसद राजेन्द्र बजगाईंले बताएका छन् । सांसदहरूलाई पार्टीले सबै कुरामा नियन्त्रण गर्न नहुने उनले बताएका हुन् ।
कांग्रेस संसदीय दलको बैठकमा सोमबार आफ्ना धारणा राख्दै सांसद बजगाईंले कांग्रेस नेतृत्वले आफ्ना सांसदहरूलाई पार्टीका मन्त्रीहरूविरुद्ध बोल्न वा लेख्न नदिने प्रयासको विरोध गरेका हुन् । उनले सांसदहरू पार्टीका अधिनस्थ नभई जनताका सार्वभौम प्रतिनिधि भएको कुरा स्मरण गर्न नेतृत्वलाई आग्रह पनि गरेका छन् ।
बजगाईंले विभिन्न विवाद र भ्रष्टाचारका आरोपहरूको विश्वसनीय स्रोत आफूसँग रहेको दाबी गर्दै भनेका थिए, 'यस्ता विषयहरूको अनुसन्धान गर्ने जिम्मेवारी पार्टीको नभई तोकिएको राज्य निकायहरूको हो ।'
कांग्रेस लोकतान्त्रिक पार्टी भएकाले कांग्रेस अधिनायकवादी बन्दै गए र आन्तरिक असहमति दमन गर्न थाले चिनियाँ शैलीको पार्टी बन्ने उनको भनाइ थियो । सभापति शेरबहादुर देउवाले पार्टीलाई चिनियाँ कम्युनिस्ट पार्टीको शैलीमा जान नदिने आफ्नो विश्वास रहेको उनको भनाइ थियो । 'पार्टी नेतृत्वको आन्तरिक गुनासाहरू केबल पार्टी फोरममै सीमित गर्नुपर्ने धारणा गलत रहेको छ । यस्तो प्रणाली कम्युनिस्ट पार्टीहरूमा हुने हो, कांग्रेसजस्तो लोकतान्त्रिक दलमा हुँदैन,' उनले भने, 'कांग्रेस नेतृत्व अहिले आन्तरिक आवाज दबाउने प्रयत्न गर्दैछ । जब पार्टीको मूल आधार नै लोकतन्त्र, बहस र आलोचनामा निर्माण भएको हो भने अहिले किन यस्ता मूल्यहरू कमजोर बनाइँदैछ ?'
सांसद बजगाईंले भ्रष्टाचार उजागर गर्नेहरूलाई दबाउनका लागि कानुन बनाउन लागिएको हो कि भन्ने आशंका व्यक्त गरेका थिए । उनले भने, 'भ्रष्टाचारका काण्ड उजागर गर्नेहरूलाई दबाउन होइन, बरु प्रोत्साहन गर्नुपर्छ ।'
सांसद बजगाईंले कांग्रेसका प्रमुख सचेतक श्यामकुमार घिमिरेको पनि आलोचना गरेका थिए । नेपालमा मजदुर संघ र समाजवादको आवश्यकता नरहेको भन्ने घिमिरेको भनाइ आपत्तिजनक रहेको बजगाईंले बताएका थिए ।
बजगाईंले कांग्रेस पार्टीभित्र सुधारको आवश्यकता रहेको भन्दै लोकतान्त्रिक मूल्य, पारदर्शिता र पार्टीभित्रको आन्तरिक बहसलाई जीवित राख्न सबैलाई सक्रिय हुन पनि आग्रह गरेका थिए ।
